BOBONARU, 19 Novembru 2025 (TATOLI) – Konsellu Koordenasaun Munisipál (CCM, sigla portugés) Bobonaru aprova elaborasaun dokumentu kona-ba Planu Dezenvolvimentu Munisipál (PDM) 2026-2030.
Sekretáriu Autoridade Munisípiu Bobonaru ba Asuntu Planeamentu, Semedo Laco, dehan antes ne’e membru CCM sira aprova ona dokumentu PDM 2026-2030, maibé ekipa téknika husi Diresaun Nasionál Dezenvolvimentu Lokál sujere atu hadi’a fali dadus demografia, análize ambientál, interpretasaun dadus no simplifika vizaun.
Notísia relevante: Autoridade Bobonaru forma GTM elabora dokumentu PDM 2025-2030
“Iha buat balu ita presiza halo alterasaun ba dokumentu, liuliu ita-nia viziaun ne’ebé uluk ita aprova. Maibé ekipa téknika haree ne’e luan liu, sira hakarak vizaun ne’e liafuan ida de’it tanba ita tau naruk iha ne’ebá susar atu atinje. Ne’e mak ohin ita aprova fali vizaun para simplifika”, Semedo Laco hateten iha reuniaun Konsellu Koordenasaun Munisipál ne’ebé realiza iha salaun Maria Tapó, kuarta ne’e.
Nia afirma katak dokumentu ne’e tarde liu sei submete ba Ministériu Admininistrasaun Estatál hodi hetan apresiasaun.
Iha sorin seluk, Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, reforsa katak presiza hadi’a duni ezbosu dokumentu ne’e tanba ne’e destinu munisípiu Bobonaru nian ba tinan lima.
“Aban-bainrua ita atu halo dezenvolvimentu saida de’it tenke liuhusi dokumentu ida-ne’e. Tanba ne’e mai husi ita hotu-hotu nia hanoin, dokumentu ne’e mak gia ita hakarak halo mehi ne’ebé ita hakarak atinje iha tinan lima oin mai”, dehan.
Dukumentus PDM mak sai dokumentu ne’ebé nesesáriu hodi define meta, prioridade no asaun sira-neʼebé implementa mak atu promove dezenvolvimentu sustentavel ba sosioekonómiku.
Dokumentu PDM nu’udár rekizitu importante ida mak sei tama mós iha kategoria avaliasaun kondisaun mínima ne’ebé sei akontese iha 2026 hodi deside munisípiu Bobonaru hakat bá podér lokál.
PDM mós sai nu’udár instrumentu xave ida iha ámbitu hodi regula opsaun sira prinisipál administrasaun rejionál ninian hodi asegura dezenvolvimentu ida-ne’ebé integradu liu no sustentavel ba nasaun Timor-Leste, espesialmente ba Bobonaru.
Notísia relevante: Bobonaru finaliza ona elaborasaun PDM 2025-2030
PDM ne’e inklui pilár importante haat mak hanesan, dahuluk Kapitál Dezenvolvimentu Sosiál kobre edukasaun, saúde, inkluzaun sosiál no protesaun sosiál, kultura, patrimóniu, juventude no desportu, relijiaun no sosiedade sivíl.
Pilár daruak, Kapitál Dezenvolvimentu Infraestrutura kobre lurón, ponte, bee no saneamentu báziku, eletrisidade, transporte no telekomunikasaun. Tuirmai, pilár datoluk, Kapitál Dezenvolvimentu Ekonómiku kobre agrikultura, turizmu, komérsiu no indústria, setór privadu, empregu kooperativa no meiu ambiente.
Pilár dahaat mak Dezenvolvimentu Enkuadramentu Instituisionál ne’ebé kobre padraun instituisionál, administrasaun lokál, rekursu umanu munisipál no sistema prosedimentu.
Jornalista: Sérgio da Cruz
Editora: Maria Auxiliadora
