DILI, 19 Novembru 2025 (TATOLI) – Parlamentu Nasionál aprova proposta Orsamentu Jerál Estadu (OJE) tinan fiskál 2026 ba Ministériu Juventude, Desportu, Arte no Kultura (MJDAK) $11.308. 436 iha faze espesialidade ho votu a-favór 42, kontra ida no abstensaun 22.
Montante ne’e hodi aloka ba saláriu no vensimentu $2.360.216, bens no serbisu $1.537.535, transferénsia públiku $6.187.995 no kapitál dezenvolvimentu $1.222.690.
MJDAK iha Programa Kultura no Patrimóniu hetan alokasaun $1.090.939. Programa Funsionamentu no Dezenvolvimentu Instituisionál iha $3.600.629 no Programa Inkluzaun Sosiál iha $6.616.868.
Orsamentu adisionál ba MJDAK pasa
Durante diskusaun espesialidade, Deputadu CNRT, PD aprezenta proposta hasai rihun $150 husi Dotasaun Jerál Estadu iha Programa Inkluzaun Sosiál iha atividade pensaun eis titulár no eis membru órgaun soberania hodi realoka fali ba MJDAK iha Programa Kultura no Patrimóniu.
Deputadu CNRT, Maria Gorumali Barreto, nu’udar proponente fundamenta proposta ne’e ho objetivu atu defende no promove ba taís Timor. Liliu organizasaun feto sira ne’ebé mak organiza no prepara ba feto maluk ne’ebé sai soru na’in taís iha territóriu.
Nune’e tau osan ne’e hodi apoiu sira, tanba haree jerasaun foun feto ne’ebé atu kontinua sai liman badaen ba soru taís komesa menus tebes.
“Tanba ne’e ho hanoin tau osan ba iha organizasaun no grupu soru na’in tais ninian, oinsá atu kontinua no promove defende nafatin hodi hamosu prepara feto jerasaun foun ba liman badaen taís ninian,” nia fundamenta.
Proposta daruak propoin hasai rihun $400 husi Dotasaun Jerál Estadu iha Programa Inkluzaun Sosiál iha atividade pensaun eis titulár no eis membru órgaun soberania hodi realoka fali ba MJDAK Programa Kultura no Patrimóniu.
Deputadu PD, Aramando Lopez, dehan iha tinan 2024 Timor-Leste partisipa dahuluk iha eventu internasionál Itália kona-ba arte nian hanesan momentu istóriku hatudu kapasidade no pontensiál kreativu artista timoroan iha nível internasionál.
Momentu ne’eba paviliaun Timor-Leste nian hetan vizita husi vizitante rihun 23-resin prova katak mundu interese tebes arte no kultura, identidade país nian.
Partisipasaun ida ne’e únika fó oportunidade ba país atu hatudu nia identidade kulturál, kreatividade no istória hodi promove imajen pozitivu kona-ba nasaun iha mundu.
Nia hateten, rezultadu pozitivu dahuluk ne’e, iha tinan 2026 país hakarak garante tan partisipasaun hodi promove kultura no arte timoroan nian estimula kreatividade no motivasaun ba artista foun sira.
Partisipasaun ne’e mós sei kontribui ba país nia diplomasia kulturál, promove turizmu no halo país ativa iha rede internasionál.
Nune’e MJDAK tuir preparativu partisipasaun tenke harii ekipa prinsipál ida ho kompozisaun komisáriu jerál atu koordena programa jerál ho serbisu seluk.
“Portantu, orsamentu ne’ebé ami propoin atu tau rihun $400 atu suporta ba atividade,” nia katak.
Ministru Juventude, Desportu, Arte no Kultura, Nelyo Isac Sarmento, simu proposta rua ne’e. Nune’e proposta rua ne’e hakat ba votasaun iha plenária pasa.
Ho aprovasaun adisionál ne’e ministériu ne’e ninia orsamentu sei iha aumenta kompara ho tetu inisiál.
Jornalista: Nelson de Sousa
Editór: Evaristo Soares Martins
