DILI, 20 Novembru 2025 (TATOLI) – Membru Polísia Nasionál Timor-Leste (PNTL) husi Korpu Seguransa Pesoál (CSP, sigla portugés) ho naran Jose Lino Tomae hetan sona husi ema dekoñesidu iha área Vila-Verde, Postu Administrativu Vera-Krús, Munisípiu Dili.
Insidente ne’e akontese iha loron-kinta, 20 Novembru 2025, tuku 4:00 madrugada.
Portavós Komandu Jerál PNTL, Superintendente Polísia Joao Belo dos Reis, informa, ohin dadeer madrugada iha insidente balun suspeitu dekoñesidu sona membru PNTL ida, kanek menór, ne’ebé agora daudaun autoridade seguransa hamutuk nia parseiru sira buka tuir hela autór ne’ebé halo asaun krime ida-ne’e hasoru membru PNTL ne’e.
Nia dehan, daudaun ne’e seidauk hetan informasaun ruma kona-ba kazu ne’e liga ho ho suspeitu ne’ebé halo asaun sona membru PNTL kaptura ona ka lae.
“Ita seidauk hetan informasaun ruma husi suspeitu ne’e, ne’ebé investigsaun sei la’o depois iha buat ruma mak ita informa,” Belo informa ba jornalista sira iha Sala konferénsia Imprensa, Ministeriu Interiór, kinta ne’e.
Belo dehan, daudaun ne’e vítima halo hela tratamentu iha Hospitál Nasionál Guido Valadares, Dili.
Jornalista: Natalino Costa
Editór: Evaristo Soares Martins
