DILI, 20 Novembru 2025 (TATOLI) – Ministru Interiór, Francisco da Costa Guterres, hateten, preokupa ho joven sira-ne’ebé halo asaun to’o sona membru Korpu Seguransa Pesoál (CSP, sigla portugés) José Lino Arcanjo Tomae ne’ebé hetan sona iha área Vila Verde.
Ministru Interior, Francisco Guterres, kondena maka’as aktu hosi joven sira ne’ebé mak hakanek Membru CSP ne’e.
“Ita investiga no buka tuir hela hetan prontu ba hatán. Ida-ne’e hatudu katak, indisiplinadu sira komete ona krime, sira tenke ba hatán iha tribunál no tribunál deside sira tenke kumpri,” Guterres hateten ba jornalista sira iha Parlamentu Nasionál, kinta ne’e.
Governante ne’e preokupa ho situsaun sira ne’e bele fó impaktu ba servisu PNTL.
“Ba oin kazu krime sira hanesan labele akontese tán. Nune’e nia husu ba PNTL tenke foti medida ba kualkér joven sé deit mak ameasa polísia hanesan autór orden públika. Kualkér joven sé de’it mak buka atu estraga polísia, nia mós iha direitu lejítimu hodi halo defeza ne’e lei iha,” nia afirma.
Notísia relevante: PNTL detein ona ema na’in-hitu ne’ebé suspetadu sona membru CSP
Jornalista: Natalino Costa
Editór: Evaristo Soares Martins
