DILI, 15 Novembru 2025 (TATOLI)–Governu liuhosi Sekretaria Estadu Komunikasaun Sosiál (SEKOMS), Sábadu ne’e, ofisialmente lansa Plataforma Sentru Informasaun Suku iha Suku Maskariñas, Postu Administrativu Vera-Krús, Munisípiu Dili.
Sektretáriu Estadu Komunikasaun Sosiál, Expedito Loro Dias Ximenes esplika objetivu prinsipál husi implementa plataforma dijitál ba suku sira atu fasilita komunidade hodibele asesu informasaun kona-ba atividade sira iha suku idak-diak.
“Ita lansa plataforma ka websaite suku iha Maskariñas ne’e nu’udár parte husi programa Governu nian ne’ebé atu lori informasaun ba komunidade,” Expedito Loro Dias Ximenes hateten bainhira lansa portál iha Sede Suku Maskarinñs.
Governante ne’e tenik Governu estabelese ona sentru informasaun suku hamutuk 28 iha teritóriu ne’ebé fora husi Dili, enkuantu Suku Maskariñas nu’udár suku dahuluk husi Munisípiu Dili no planu sei lansa tan iha Bidau no Kampu-Alór.
Nia solisita komunidade iha Maskariñas atu asesu ba website www.mascharinas.suku.tl nune’e bele iha informasaun ne’ebé kredivel ligadu ho dadus no faktu sira.
Entretantu, serimónia lansamentu portál dijitál referidu partisipa husi reprezentante Ministériu Administrasaun Estatál (MAE) liuhosi Diretór Jerál Desentralizasaun no Governu Lokál, António Guterres, autoridade lokál suku no komunidade iha Maskariñas.
Jornalista: Natalino Belo
Editór: Xisto Freitas da Piedade
