DILI, 21 Novembru 2025 (TATOLI) – Vise-Primeiru Ministru, Ministru Koordenadór ba Asuntu Sosiál, Mariano ASSANAMI Sabino, hetan vizita husi Rede ONG sira husi nasaun CPLP hodi aprezenta kona-ba titulár koordenasaun asuntu sosiál nian husi nasaun membru sira hodi halo asaun hamutuk atu garantia katak, laiha labarik ida iha CPLP mak sei husik iha kotuk.
Rede “Vozes de Nós”, ne’ebé hamutuk ONG sira hodi fó apoiu ba joven no labarik sira husi nasaun sira língua portugés, hala’o enkontru ho Vise-Primeiru-Ministru no Ministru Koordenadór Asuntu Sosiál ho intensaun aprezente ba titulár koordenasaun asuntu sosiál, ne’ebé iha responsabilidade mós ba INDDICA (Institutu ba Defeza Direitu Labarik) — atividade sira ne’ebé hala’o durante enkontru iha Díli, iha Ministériu Solidariedade Sosial, entre loron 18 to’o 20 fulan-Novembru no iha okaziaun ne’e mos, sira konvída Vise-Primeiru-Ministru atu sai padriñu ba rede ida-ne’e.
Tema enkontru ne’e mak “Direitu Labarik iha nasaun sira CPLP iha atualidade no estratéjia intervensaun ba futuru” no enkontru ne’e hamutuk reprezentante husi organizasaun barak husi Estadu-membru sira hodi diskute prioridade no estratéjia atu proteje no promove direitu labarik no joven sira nian.
Enkontru ne’ebe hala’o iha Kapitál Timor-Leste hodi hasai “Deklarasaun Díli”, dokumentu orientadór ne’ebé hakarak sai referénsia komún ba nasaun sira CPLP, iha área protesaun ba labarik no joven iha situasaun vulnerável.
Deklarasaun Díli ne’e ekipa rede entrega ona ba Vise-Primeiru-Ministru no Ministru Koordenadór Asuntu Sosiál, hanesan sinál kompromisu ba joven no labarik sira husi Estadu-membru CPLP.
Deklarasaun Díli rezulta husi interkámbiu 5.º Rede “Vozes de Nós”, ne’ebé hamutuk organizasaun sira CPLP nian ne’ebé servisu iha área defeza direitu labarik no joven vulnerável.
Dokumentu ne’e kontinua servisu ne’ebé hahú iha 2009, liuhosi projetu “Meninos de Rua: inclusão e inserção”, ne’ebé fó kapasidade ba arte-edukasaun, promove kooperasaun entre entidade estadu no la’ós estadu sira, no kontribui ba dezenvolvimentu polítika protesaun labarik iha nasaun sira CPLP.
Deklarasaun Díli hatudu objetivu estratéjiku importante sira hodi orienta polítika komún iha CPLP, hanesan dezenvolvimentu integrál labarik, prevensaun violénsia no explorasaun hotu-hotu, promosaun edukasaun inkluziva, reforsa servisu saúde infantíl, apoiu ba família sira, prioridade universál ba labarik iha polítika no orsamentu estadu, partisipasaun efetivu husi labarik no joven, konsolidasaun no artikulasaun sistema protesaun sosiál, di’akliu kolekta no partilla dadus, krize mekanismu monitorizasaun no avaliasaun.
Deklarasaun Díli ne’e apela ba futuru ida ne’ebé laiha labarik ida CPLP sei husik iha kotuk, no hakarak estimula asaun hamutuk, kontínua no estrutura entre Estadu-membru sira no organizasaun envolvidu hotu.
TATOLI
