“Agradese Prezidente Ramos-Horta bele lori ha’u hasoru Papa Leão XIV”

DILI, 24 Novembru 2025 (TATOLI)—Negosiante Sofia Hornai dos Santos hato’o agradesementu no orgullu ba Prezidente Repúblika José Ramos-Horta tanba bele lori nia ba hasoru Papa Leão XIV iha Vatikanu.

Notísia Relevante: Prezidente Ramos-Horta konvida negosiante Sofia dos Santos hasoru Papa Leão XIV

“Ha’u agradese no orgullu tebes ba Prezidente bele lori ona ha’u ba Vatikanu no hasoru ona Papa Leão XIV,” Sofia hateten ho matan-been hafoin fila husi Vatikanu, iha Palásiu Prezidensiál Nicolau Lobato, Bairu Pite, ohin.

Iha okaziaun ne’e Ramos-Horta mós klarifika ba públiku katak konvida Tia Sofia hasoru Papa Leão XIV atu fó onra ba inan-aman timoroan ida-idak ne’ebé sira-nia sakrifísiu nonook harii nasaun nia futuru.

“Ita hatudu ba mundu katak polítika esterna Timor-Leste nian la’ós de’it kona-ba envolvimentu podér, maibé kona-ba fó kbiit ba ita-nia povu no fahe ita-nia esperiénsia susesu iha dalan ba pás,” Ramos-Horta hateten.

Vizita ne’e reafirma ho susesu Timor-Leste nia parseria internasionál ne’ebé metin no ninia kompromisu atu sai lian konxiénsia, kompaixaun no diálogu konstrutivu iha komunidade globál.

“Ha’u lori tia Sofia, negósiante simplis ida, nia faan modo iha loja Meimart Audian nia oin, ha’u lori tanba kestaun ema, tanba sira mós ema ita hanesan de’it,” Ramos-Horta dehan.

Notísia Relevante: “Ha’u ho Papa Leão XIV ko’alia kona-ba situasaun Timor-Leste nian”

Jornalista : Hortencio Sanchez

Editór       : Cancio Ximenes