BOBONARU, 25 Novembru 2025 (TATOLI) – Autoridade Munisípiu Bobonaru hamutuk ho organizasaun Fórum Komunikasaun ba Feto Timor Lorosa’e (FOKUPERS) no Asosiasaun Chega ba Ita (ACBit) realiza marsa saudavel hodi komemora tinan 50 Proklamasaun Independénsia, 28 Novembru 1975-28 Novembru 2025, no kampaña violénsia kontra feto sira ho tema “Hamutuk hasa’e konxiénsia literasia dijitál no online seguru ba feto no labarik feto iha diversidade hotu”.
Kompetisaun marsa saudavel ne’e hahú husi sentru abastesimentu Aitula Fuels Soso to’o jináziu Maliana, ne’ebé partisipa husi grupu 24 mak hanesan funsionáriu Governu nian, estudante no organizasaun parseira sira.
Rezultadu husi marsa ne’e hatudu funsionáriu PNDS munisípiu Bobonaru sai vensedór dahuluk, Eskuteiru daruak no Feto Potensiál Bobonaru datoluk, no Eskola Téknika Agríkola Moleana dahaat no ikus Edukasaun Munisípiu Bobonaru.
Rezultadu ne’e ekipa júri sira foti bazeia ba avaliasaun pontu 10 hanesan – Pontualidade iha fatin preparasaun, espíritu no entuziasmu, dominasaun kompeténsia téknika no orden unida, obedesese ba orden, uniforme ekipa, serbisu ekipa, aliñamentu, ekipa sólida, unidade ekipa no seluk tan.
Notisía relevante: Autoridade Bobonaru prevee rihun $40 hodi selebra 28 Novembru
“Agradese ba hotu-hotu nia partisipasaun ativa iha eventu ne’e. Husi atividade hatudu katak hotu-hotu iha responsablidade atu komemora loron importante ida-ne’e iha ita-nia área”, Komandante Polisía Munisípiu Bobonaru, Superintendente Xefi Agustinho Gomes da Silva, hateten hafoin termina atividade ne’e iha jináziu Maliana.
Responsavel atividade ne’e rekoñese katak eventu ne’e seidauk perfeitu, maibé ne’e hanesan faze inisíu ida atu hadi’a iha futuru. “Nune’e, eventu ne’ebé ita halo maski simples, maibé iha sentidu”, dehan.
Koordenadora Advokasia FOKUPERS, Natália de Jesus, dehan loron ne’e mós hamutuk kontra violénsia sira ne’ebé hasoru feto maluk sira, liuliu selebra tinan 50 ne’ebé Timor-Leste konsege alkansa independénsia ho sakrifisiu boot.
Marsa saudavél ne’e hetan mós animasaun “drum band” husi estudante Koléjiu Infante de Sagres Maliana.
Notísia relevante: Gregório Saldanha: 28 Novembru nu’udar loron embriaun ba luta ukun rasik aan
Jornalista: Sergio da Cruz
Editora: Maria Auxiliadora
