OEKUSI, 25 Novembru 2025 (TATOLI) – Empreza lokál hamutuk 11, tersa ohin, kompete ho aprezenta planu negósiu inovativu ba Institutu Apoia Dezenvolvimentu Emprezariál, Institutu Públiku (IADE) Rejiaun Administrativa Espesiál Oekusi Ambeno (RAEOA), hodi asesu fundu ba Programa Fasilidade Inkubasaun Negósiu (FIN) périodu 2025 nian.
Kompetisaun planu negósiu ne’e, abertura direitamente husi Prezidente Autoridade RAEOA, Régio sa Cruz Salu, hodi promete, prontu atu apoia no tau matan ba emprezáriu ne’ebé iha planu negósiu inovativu, tanba atividade ne’e relasaun ho programa movimentu empreendedorizmu ka gerakan kewirausaha Oekusi.
“Lansamentu ohin ne’e parte husi modalidade atu avalia no promove kapasita ita-nia benefisiáriu sira nu’udar setór privadu no kooperativa sira, no família sira-ne’ebé hala’o atividade empreendedorizmu, bele hetan apoia fundu atu dezenvolve tan sira-nia inisiativa negósiu ne’e, ne’ebé nu’udar autoridade sei apoia, tanba ami mai atu reforsa de’it, maibé intermus finasiamentu hanesan tinan ne’e $2000, maibé ne’e orsida sei bele aumenta no hamenus depende husi karatér investimentu ne’ebé empreendedorista sira propoin mai, ne’ebé ita nafatin apoia no tau matan nafatin ba futuru,” nia hateten.
Notísia relevante:MKAE-RAEOA selebra akordu entegra kompeténsia IADE ba Oé-Cusse
Iha biban ne’e, Koordenadór IADE Oekusi, Ermundo de Jesus Pereira, aprezenta, programa FIN ne’e, hahú ho rejistrasaun dahuluk ba emprezáriu lokál 138, maibé hafoin ekipa halo avaliasaun inisiál iha terrenu no halo verifikasaun iha 58 de’it mak kontinua ba etapa tuirmai.
Hafoin ne’e, ekipa tékniku IADE kontinua halo tan asesmentu faze daruak ba emprezáriu 58 haree direita sira-nia ezisténsia negósiu no fatin, rezultadu na’in-13 mak pasa, no avaliasaun ikusliu mak konsege identifika emprezáriu 11 mak pasa hodi kompete iha aprezenta planu negósiu.
Nia informa, husi emprezáriu lokál sira 11 ne’e mak kompete hodi aprezenta sira-nia planu negósiu no rezultadu finál, IADE sei foti vensedór emprezáriu na’in-haat de’it, mak sei sai manan-na’in iha tinan-2025 nian hodi asesu fundu FIN $2000 kada emprezáriu, tanba IADE preprada fundu $8000 de’it.
“Tanba ita hakarak atu hamosu emprezáriu lokál sira-nia negósiu ne’e, ho karatér inovativu, katak hamosu buat foun no modelu foun iha bisnis (negósiu), tanba bisnis ne’e ema hotu bele, maibé atu halo inovasaun, dalaruma difisil uitoan, tan ne’e mak IADE nia planu ida, katak kada tinan realiza planu ne’e, atu buka emprezáriu sira-ne’ebé iha planu negósiu inovativu, presiza dudu sira-nia ideia negósiu inovativu ne’e kontinua eziste hosi asesu ba merkadu,” nia hateten iha salaun IADE Oekusi, ohin.
Notísia relevante:IADE fasilita formasaun mikro negósiu ba grupu feto iha Oekusi
Koordenadór ne’e afirma, hafoin emprezáriu lokál haat ne’ebé asesu fundu FIN ne’e, ekipa tékniku husi IADE sei kontinua halo akompañamentu durante fulan rua, hodi kontinua tau matan, no enkoraja to’o susesu, no aprezenta ideia negósiu inovativu ne’e iha merkadu.
“Tanba asesu fundu ne’e, atu hamoris emprezáriu lokál sira-nia ideia negósiu, la’os fó tiha apoia, depois ita husik de’it, maibé presiza tau matan ba sira-nia atividade planu negósiu,” nia afirma.
Notísia relevante:IADE lansa Kompetisaun Planu Negósiu Inovadór 2025 ba da-11
Entretantu, emprezáriu lokál na’in-11 ne’ebé kompete iha aprezentasaun planu negósiu ne’e mak hanesan, Jeronimo Osvaldo Soni husi suku Bobometo ho atividade negósiu prodús ai-nanas, Alita Pauf husi suku Usitasa’e ho atividade negósiu soru-tais beti-bose, Azor Armando Gomes husi suku Nípani ho atividade haki’ak fahi.
Fridolina Irene Bana husi suku Kutete ho atividade produs kiri-kiri, Francisco Elo husi suku Usitaqueno ho atividade halo stek sabraka, Lena de Fátima Marques husi Costa ho atividade produsaun produtu lokál, Adriano Elo husi suku Kutete ho atividade hospitalaria turizmu, António Tefa husi suku Naimeko ho atividade rentál komputadór, Domingos Quebo husi suku Kutete ho atividade tambak ikan (tanke pisikultura – haki’ak ikan) no António Sila husi suku Abani ho atividade ortikultura.
Jornalista: Abílio Elo Nini
Editór: Rafael Ximenes de A. Belo
