DILI, 25 Novembru 2025 (TATOLI)—Ministru Transporte Komunikasaun, Miguel Gonçalves Manetelu, hateten nia parte orienta ona komisaun ministerial ne’ebé kompostu husi Administrasaun Nagevasaun Aérea Timor-Leste, Empreza Públiku (ANATL, E.P) no Terra Propriedade hodi halo notifikasaun ba komunidade afetadu na’in-52 iha prosesu espansaun konstrusaun aeroportu Internasionál Prezidente Nicolau Lobato, Komoro.
Notísia Relevante: MTK husu komunidade efetadu 52 koopera ba dezenvolvimentu no espansaun aeroportu Komoro
Kna’ar ne’e fó ona ba ANATL, E.P, tanba instituisaun ne’e mak hanesan koordenadór liña ministeriál nian no sira koordena ona ho Terra no Propriedade, nune’e halo notifikasaun ba komunidade afetadu espansaun aeroportu.
“Tanba ne’e, ha’u husu ba sira atu aselera lalais prosesu notifikasaun ne’e hodi evita komunidade sira haki’ak manu liuliu pombu atu labele semo tama ba pista aeroportu, tanba prosesu atu halo espansaun ba aeroportu ne’e la’o hela,” Governante ne’e hatete ba jornalista sira hafoin lansa tray out ba koneksaun internet fibra ótika ligasaun husi Austrália mai Timor-Leste ba iha nivél liña Governu, iha Beto, ohin.
Antes ne’e, komunidade ne’ebé afetadu ba espansaun konstrusaun aeroportu hamutuk 252 maibé komunidade ne’ebé Governu indemniza ona hamutuk 200.
Tuir nia, komunidade ne’ebé sei reklama hanesan disputa ba rai hamutuk 52, maibé entre sira-ne’e Governu indemniza ona na’in-19 no hela na’in-38 mak seidauk hetan indemnizasaun.
Jornalista : Alexandra da Costa
Editór : Cancio Ximenes
