BOBONARU, 26 Novembru 2025 (TATOLI) – Inan-aman, família, no komunidade sira iha papél xave hodi forma futuru labarik Timor-Leste nian.
Deklarasaun ne’e hato’o husi Prezidente Institutu Nasionál Direitu ba Labarik (INDDICA, sigla portugés), Dinorah Granadeiro, iha komemorasaun Loron Mundiál Labarik nian, ne’ebé selebra iha Bobonaru.
Dinorah subliña katak tema ba tinan ida ne’e “Ha’u-nia Loron, Ha’u-nia Direitu”, la’ós de’it fó hanoin ba Governu kona-ba ninia obrigasaun atu kumpre direitu labarik nian, maibé mós enkoraja elementu hotu-hotu iha sosiedade atu halo reflesaun, katak dukasaun no dezenvolvimentu labele sai de’it responsabilidade profesór sira ka instituisaun edukasionál sira-nian.
“Dala barak ita haluha katak edukasaun dahuluk hahú iha uma. Labarik sira hahú aprende atu ko’alia, la’o, antes sira to’o idade eskolár. Iha eskola ne’e papél prinsipál maka inan-aman no membru família sira”, nia hatete iha Jinázíu Maliana, kuarta ne’e.
Tuir nia, profesór sira serve de’it hanesan suplementu, enkuantu fundasaun primária ba labarik ida nia dezenvolvimentu determina husi ambiente família nian. Aleinde família, Dinora mós subliña responsabilidade komunidade luan nian hodi asegura labarik sira moris iha ambiente ida ne’ebé seguru no dignu.
“Oinsá sosiedade trata labarik sira sei determina oinsá sira dezenvolve. Maski sira sei ki’ik, labarik sira iha nafatin direitu hanesan ho ema hotu”, nia destaka.
Nu’udar instituisaun espesializada iha protesaun labarik, INDDICA kontinua fornese edukasaun no apoiu ba inan-aman no komunidade sira hodi ajuda sira komprende valór umanitáriu sira ne’ebé presiza atu salvaguarda no proteje labarik sira.
Iha biban ne’e, Dinorah mós fó hanoin ba Governu lokál munisípiu Bobonaru atu aloka orsamentu espesiál kada tinan hodi komemora Loron Nasionál Labarik.
Nia fiar katak Ezekutivu nia atensaun ba labarik sira labele menus importante duké feriadu esensiál sira seluk hanesan Loron Proklamasaun, Loron Juventude, ka Loron Veteranu sira.
Aleinde ne’e, destaka mós importánsia husi investimentu tempu naruk ba jerasaun sira iha future. Hodi fiar katak atu kumpre nesesidade nutrisionál labarik ida nian hahú kedas iha tempu ne’ebé sira sei iha knotak maka forma investimentu ne’ebé fundamentál liu.
Nia enkoraja família sira atu labele foka de’it ba sosa telemovel ka veíkulu sira ba sira-nia oan sira, maibé atu fó prioridade ba nutrisaun di’ak liuhusi konsumu susubeen no animál família nian.
“Karik ita hakarak jerasaun timoroan ida ho kualidade, investimentu di’ak liu maka hahú ho nutrisaun saudavel. Labarik saudavel sira sei dezenvolve di’ak liu, no ne’e maka investimentu boot liu ba nasaun nia futuru”, realsa.
Ba nia, asuntu ida-ne’e reflete INDDICA nia kompromisu atu defende labarik sira-nia direitu no mobiliza knaar ativu família no komunidade sira-nian hodi harii jerasaun di’ak liu ba Timor-Leste.
Notísia relevante: Labarik TL husu asaun reál Governu nian kontra traballu infantíl no violénsia
Jornalista: Sergio da Cruz
Editora: Maria Auxiliadora
