BOBONARU, 27 Novembru 2025 (TATOLI) – Traballadór lokál hamutuk grupu sia ne’ebé serbisu iha projetu konstrusaun ba irrigasaun Genumatan, suku Ritabou, postu administrativu Maliana, munisípiu Bobonaru, halo asaun protestu hodi ezije sira-nia direitu ba empreza Bia-Basan Mogen Unipesoál Lda, tanba la halo pagamentu.
Asaun protestu ne’e konsege hamosu dezentendimentu entre parte rua.
Traballadór, Daniel Talo Mali, hateten sira halo asaun ne’e, tanba serbisu finaliza kle’ur ona, maibé to’o agora empreza seidauk selu sira.
“Ami-nia devér halo hotu tiha ona, hela de’it ami-nia direitu. Uluk ami halo, imi dehan imi tenke aselera halo pursentu ne’e sa’e para ami bá foti osan. Depois osan ne’e ba foti 50% hamutuk rihun $100-resin hodi mai halo fali buat seluk”, nia hato’o ho lian maka’as iha terrenu, bainhira halo asaun referida.
Iha fatin hanesan, traballadór Leonito Lopes reforsa katak problema ne’e sira hato’o ona ba Sekretaria Estadu Formasaun Profisionál no Empregu (SEFOPE) hodi fasilita mediasaun no iha ona akordu husi parte rua katak, sei halo pagamentu iha loron 27 fulan-Novembru ne’e.
“Agora ita-boot sira seidauk selu, imi promete dehan ohin loron tenke selu duni”, nia kestiona.
Hatán ba lamentasaun ne’e, pesoál ida husi empreza ne’e hato’o katak, prontu no sei halo pagamentu iha semana oin tuir prosesu legál, tanba traballadór sira lori ona kestaun ne’e ba SEFOPE.
Hafoin dezentendimentu, parte rua konkorda malu no prontu hasoru malu iha semana oin.
Dezentendimentu ne’e la perturba atividade no serbisu ne’ebé traballadór grupu seluk halo iha intek irrigasaun nian kontinua la’o.
Tuir observasaun jornalista Tatoli, obra kanál irrigasaun ne’ebé liga ba natar kuaze hotu ona no daudaun ne’e foku de’it ba intek no empreza mós mobiliza ona materiál lokál hanesan fatuk, rai-henek no kerikil atu aselera serbisu molok udan monu rai. No serbisu iha terrenu superviziona másima husi tékniku Planu Dezenvolvimentu Integradu Munisipál (PDIM) Bobonaru nian.
Obra ne’e konstrui ho orsamentu PDIM tinan 2025 ho valór kontratu $229.429,35 hahú iha fulan-Abríl no remata iha Setembru 2025, maibé la konsege no hetan estensaun ba fulan rua tan.
Notísia relevante: AMB ameasa atu hapara kontratu empreza konstrutora irrigasaun Genumatan
Jornalista: Sergio da Cruz
Editora: Maria Auxiliadora
