DILI, 04 Dezembru 2025 (TATOLI)—Ministru Asuntu Kombatente Libertasaun Nasionál, Gil da Costa Monteiro hateten pagamentu ba veteranu rejistadu 2009 nian sei hahú iha 15 Dezembru 2025.
“Naran no orsamentu preparadu no aprova ona. Pelumenus iha 15 ka 16 Dezembru bele hahú ona pagamentu ba veteranu hamutuk 43.000 ne’e,” Oan-Soru ba jornalista sira iha Palásiu Governu, Kuarta ne’e.
Notísia relevante: Veteranu rejistadu 2009 sei simu uluk pensaun iha Dezembru 2025
Nia esplika, ba pagamentu dahuluk sei hala’o de’it iha Dili tanba konta bankária sei iha-ne’e hotu atubele halo ajustamentu ba sistema karik iha buat balun mak sala.
“Pagamentu ida inísiu ne’e tenke halo iha Dili de’it, tanba konta bankária foun ho buat sira-ne’e, sei iha konesaun ho Diresaun Nasionál Pensaun Ministériu nian, tanba orsida dokumentu balun falla iha-ne’ebá karik tenke mai iha-ne’e para sira na’in halo ba ajustamentu permanente. Kuandu liu ona ida-ne’e laiha problema. Totál orsamentu ba pagamentu hamutuk millaun $49-resin,” Gil informa.
Jornalista: Osória Marques
Editór: Xisto Freitas da Piedade
