DILI, 09 Dezembru 2025 (TATOLI)–Koordenadór Gabinete Kurríkulu Unidade Nasionál Ministériu Edukasaun (ME), João Maupelu informa ME seidauk bele anúnsia rezultadu ezame nasionál tanba sei iha prosesu validasaun valór.
“Agora ami seidauk finaliza prosesu validasaun ajustamentu valór ezame nasionál husi primeiru períodu no segundu períodu 2025. Ne’ebé, ita sei bele fó-sai tuir loron tentativa ne’ebé Ministériu Edukasaun iha,” nia dehan ba jornalista sira iha nia kna’ar fatin, Vila Verde, Dili, Tersa ne’e.
Maupelu hatutan loron tentativa mak 12 Dezembru maibé sei haree estudante idak-idak nia valór entaun kle’ur.
Notísia relevante: Ezame Nasionál nu’udár dezempeñu akadémiku hodi reafirma prinsípiu pedagójiku fundamentál
“Ida-ne’e ramata ita sei submete ba Ministra Edukasaun, Dulce de Jesus Soares, hodi verifika tiha lai hafoin ita bele deside,” João informa.
Tuir dadus, estudante finalista tantu Eninsu Báziku no Eninsu Sekundáriu Jerál inklui Ensinu Sekundáriu Tékniku Vokasionál 2025 hamutuk 54.000.
Jornalista: Osória Marques
Editór: Xisto Freitas da Piedade
