OEKUSI, 09 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, tersa ne’e, inaugura kapela Santa Teresinha Menina de Jesus Oénunu iha aldeia Oél-Nanoe suku Suni-Ufe sub-rejiaun Nítibe, ne’ebé nu’udar projetu regulár husi Programa Nasionál Dezenvolvimentu Suku (PNDS) 2025 nian.
Notísia relevante:ZEEDOA inaugura projetu PNDS regulár ba sala estensaun EBF Bítila iha Bene-Ufe
Hafoin inaugura, Régio da Cruz Salu, konsidera prezensa PNDS importante iha prosesu dezenvolvimentu integradu iha área rurál hodi haforsa infraestrutura bázika ba asuntu kultura, relijiaun no asuntu sosiál.
“Importánsia PNDS iha prosesu dezenvolvimentu integradu suku iha área rurál, ne’e mós haforsa kultura, katak sei ita ho ita komunidade hamutuk ho enerjia atu halo netik buat ruma ho apoia Governu mínimu nusa mak labele? Entaun, ita aprende husi ne’e. Ita-nia Governu ho Estadu kontinua haforsa ita-nia povu ba buat sira-ne’ebé bázika bazeia ba povu nia desizaun ba prioritiza saida mak importante liu atu dezenvolve,” nia orgullu.
“Hakarak kongratula no husu nafatin Ministériu Administrasaun Estatál, liu-liu programa PNDS atu kontinua apoia dezenvolvimentu suku iha Oekusi liu-liu ba área rurál sira, nune’e Autoridade RAEOA bele kontinua haree buat sira-ne’ebé estratéjiku, no iha tempu hanesan kontinua iha enkuadramentu bo’ot ida-ne’ebé halo dezenvolvimentu deskonsentrada mai iha nivél suku no aldeia sira, ne’ebé ho prezensa programa PNDS bele ajuda ita-nia serbisu dezenvolvimentu integradu bele la’o lais iha nivél baze,” autoridade ne’e hato’o.
Iha fatin hanesan, reprezentante Sekretária Exekutiva PNDS Nasionál, Aplonia L.L de Araújo, informa, konstrusaun harii kapela Oénunu, komunidade no autoridade lokál suku Suni-Ufe mak propoin nu’udar prioridade ba projetu PNDS 2025 nian.
“Iha 2024, ekipa PNDS husi munisipíu no postu administrativu mai hala’o sosializasaun, komunidade no autoridade lokál sira iha Suni-Ufe mak deside hodi propoin atu halo konstrusaun ba kapela Oénunu sai prioridade ba programa PDNS 2025, tanba ne’e ita agradese maske enfrenta obstaklu oi-oin maibé ohin ita konsege halo inaugurasaun, ne’ebé husu nafatin ita hotu nia kontribuisaun atu kuidadu nafatin obra ne’e, nune’e bele utiliza ba sarani ba atividade relijiaun nian,” nia katak.
Notísia relevante:PNDS Oekusi aprova projetu rua hodi implementa iha suku Monemeko no Kutete
Xefe suku Suni-Ufe, Crisanto Tamele, agradese Governu, tanba kada tinan aloka direita fundu ba suku sira hodi dezenvolve prioridade sira kada suku.
“Lori komunidade Suni-Ufe fó agradese ua’in ba Governu, ne’ebé iha hanoin ho vontade polítika atu tau mós polítika ida, oinsá atu dezenvolve parte igreja ninian. Durante ne’e ami sempre kestiona no hakilar iha ita hotu nia observasaun, maibé orgullu tanba konsege hadi’a duni ami-nia kepla ne’e, tanba kapela ne’e envolve sarani sira mai husi aldeia tolu, durante ne’e mós ami kontribui ba serbisu fíziku hanesan aterru, lalin-fatuk no serbisu seluktan, ida-ne’e hatudu katak ita serbisu hamutuk, Governu apoia uitoan, komunidade mós kontribui uitoan, nune’e serbisu ne’e bele la’o ho susesu to’o ohin ita halo inaugurasaun,” nia orgullu.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
Entretantu, medida konstrusaun kapela ne’e metru 9×12, ne’ebé ezekuta husi Ekipa Jestaun Suku ho montante rihun $44,250.00 ho durasaun tempu durante fulan-haat.
Jornalista: Abílio Elo Nini
Editór: Rafael Ximenes de A. Belo
