OEKUSI, 09 Dezembru 2025 (TATOLI) – Koordenadór Zona Ekonomia Espesiál Dezenvolvimentu Oekusi Ambeno (ZEEDOA), Herculano de Souza, tersa ne’e, inaugura projetu sala estensaun ba Eskola Bázika Filiál (EBF) Bítila ne’ebé implementa husi Programa Nasionál Dezenvolvimentu Suku (PNDS) regulár 2025 nian, iha aldeia Bítila suku Bene-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA).
Iha ámbitu ne’e, nia promete sei koordena ho serbisu edukasaun Oekusi, atu kompleta kedas mobiliáriu meza no kadeira, nune’e bele fasilita prosesu aprendizajen tanba bazeia matadalan programa PNDS la envolve mobiliáriu atu fornese ba eskola referida.
“Ita agradese ba serbisu ida-ne’e, hein katak ita-nia oan sira iha suku Bene-Ufe, sei utiliza fatin ne’e, hodi bele aprende tuir programa edukasaun nian. Ohin, ha’u koordena ona ho PNDS no edukasaun katak, projetu ne’e la inklui mobiliáriu ba sala sira, entaun ida-ne’e kna’ar no rsponsabilidade serbisu edukasaun nian atu bele fornese tanba mobiliáriu iha ona Oekusi, ne’ebé ha’u fiar katak komesa semana oin bele mobiliza ona, nune’e iha Janeiru 2026 komesa letiva foun, alunu no mestre sira bele utiliza ona,” nia hateten, iha ámbitu inaugurasaun iha EBF Bítila, ohin.
Notísia relevante:Autoridade Bene-Ufe Nítibe espera PNDS Oekusi aselera konstrusaun EBF Bítila
Iha fatin hanesan, reprezentante Sekretária Exekutiva PNDS Nasionál, Aplonia L.L de Araújo, rekomenda ba entidade sira iha suku Bene-Ufe atu kontinua tau matan, tanba obra ne’e Governu estebelese, hodi fasilita oan sira atu asesu eskola ho di’ak.
“Tuir matadalan PNDS obra ne’e tenki remata iha loron 120 nia laran, agradese ohin ita-bele inaugura ona ho susesu, ida-ne’e hatudu katak, ekipa sira ho parte hotu, ita hatudu ona ba públiku ba ita-nia vontade no espiritu tanba dezenvolve ona ita-nia suku. Husu nafatin ba ita hotu nia kontribuisaun mantein nafatin kuda ita-nia espiritu nasionalizmu, hodi kuidadu nafatin obra ne’ebé Governu halo ona ba ita, nune’e kuidadu nia sustentabilidade, tanba matadalan PNDS fó dalan atu halo manutensaun ba durasaun tempu tinan rua nia laran, maibé molok ita halo manutensaun espera bele kontribui ho maneira jestaun rasik hodi tau matan nafatin ba eskola ne’e,” nia katak.
Notísia relevante:31 outubru, projetu PNDS regulár iha RAEOA tenke konkluídu
Jestór sub-rejiaun Nítibe, Agustinho Afulit, reprezenta komunidade suku Bene-Ufe hato’o agradese ba Ministériu Administrasaun Estatál, tanba apoia finanseiru ba suku sira hodi deside prioridade ne’ebé nesesáriu atu estabelese iha suku ida-idak.
“Agradese ba programa PNDS liuhusi Ministériu Administrasaun Estatál, tanba iha inisiativa atu fó kompeténsia ba suku sira atu bele serbisu hamutuk ho departamentu relevante sira, liu-liu serbisu edukasaun atu tulun ita-nia oan sira-ne’ebé durante ne’e, sira la’o ho distánsia dook atu asesu eskola iha suku laran, ne’ebé ami agradese tanba ohin loron eskola ne’e hamriik ona iha ne’e, atu ba oin fasilita di’ak liután oan sira,” nia orgullu.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
Entretantu, konstrusaun ne’e ezekuta hosi Ekipa Jestaun Suku ho montante rihun $48,750.00 ho durasaun tempu durante fulan haat hodi konstrui ba sala tolu inklui eskritóriu ida.
Jornalista: Abílio Elo Nini
Editór: Rafael Ximenes de A. Belo
