DILI, 09 Novembru 2025 (TATOLI)—Diretór Servisu Saúde Munisípiu Aileu, João de Jesus, hateten Servisu Saúde Munisípiu Aileu hahú halo ona edukasaun no promosaun saúde ba komunidade atu prevene moras dengue.
Notísia Relevante: OMS entrega ona sertifikadu livre husi Malária ba MS
“Daudaun ne’e pesoál saúde sira hahú halo edukasaun no promosaun saúde ba komunidade iha merkadu no mós tama sai bairru inklui mós liu husi Rádiu komunidade Raihusar Aileu. Aleinde ne’e, halo mós fomigasaun no distribui ai-moruk abate ba komunidade,” João de Jesus hateten ba Agência TATOLI liuhusi telefónika, ohin.
Nia husu ba komunidade atu kontínua halo limpeza ba ida-idak nia uma oin, atu nune’e bele prevene moras dengue, tanba moras dengue afeta liuliu ba labarik ki’ikoan sira ne’ebé mak ho idade tinan 14 mai karik.
“Nune’e, ami husu ba komunidade atu mantein prevensaun ne’ebé mak Ministériu Saúde fó sai ona ne’e,” nia dehan.
Nia relata, hahú husi fulan-Janeiru to’o Novembru 2025 ne’e, Servisu Saúde Munisípiu Aileu rejista pasiente dengue hamutuk na’in-haat (4) no husi númeru ne’e laiha ida mak lakon vida.
“Kazu dengue iha Servisu Saúde Munisípiu Aileu hahú husi janeiru to’o novembru ita iha kazu haat ne’ebé mai husi Sentru Saúde Komunitáriu Aileu Vila iha rua, Sentru Saúde Komunitária Remexio na’in-ida, Sentru Saúde Komunitáriu Laulara na’in-ida no Sentru Saúde Lequidoe mak zero ka seidauk rejistu,” João de Jesus hateten.
Jornalista : Felicidade Ximenes
Editór : Cancio Ximenes
