BOBONARU, 11 Dezembru 2025 (TATOLI)-Komunidade husu ba Ministériu Obra Publika (MOP) atu konstrui muru potesaun iha mota Osala, ne’ebé lokaliza iha aldeia Mude, suku Meligo, postu administrativu Kailaku, munisípiu Bobonaru, hodi bele sátan bee-mota, nune’e labele akontese inundasaun bainhira udan-boot.
Preokupasaun ne’e hato’o husi Xefe Suku Meligo, Duarte Soares, tanba iha loron 10 Dezembru ne’e akontese inundasaun, hafoin udan-boot iha parte loraik, hodi afeta ba uma-kain neen no danifika plantasaun sira.
Notísia relevante: MDI identifika mota tolu iha Kailaku halo degradasaun rai ektare 455
“Tinan-tinan la akontese hanesan ne’e. Foin primeira vés. Kauza ida-ne’e tanba bee iha tiha leten, uma iha fali kraik. Komunidade hela iha ne’e la’ós foin tinan ida ka rua, dezde Indonézia nia tempu, maibé tanba iklima mak hanesan ne’e. Ita hotu la espera dezastre horisehik ne’e atu akontese”, nia hateten ohin.
Biban ne’e, xefe suku agradese ba Autoridade Protesaun Sivíl (APC Sigla Portugues) no Diresaun Servisu Munisipál Protesaun Sivíl (SMPC) Autoridade Bobonaru ne’ebé rapidamente responde ona pedidu hodi apoia pakote emerjénsaa ba vítima afetada sira.
Reprezentante Administradór Postu Administrativu Kailaku, Isabel Soares, konfirma katak autoridade postu prepara ona proposta emerjénsia atu submete ba Prezidente Autoridade Bobonaru hodi enkamiña ba Ministériu Obra Públika, tanba fatin ne’e risku ona no posibilidade sei akontese tan inundasaun iha tempu tuirmai.
“Se ita la halo lalais, udan-boot mai, uma sira ne’e ba nafatin, tanba mota iha leten ne’ebá ne’e fó impaktu maka’as, udan mai beibeik nia bele estraga [uma no sasán] komunidade husi suku Meligo no Atudara”, salienta.
Iha sorin seluk, Komandante APC Bobonaru, Zeca Michael Lopes, dehan iha tempu badak sei koordena ho Prezidente Autoridade MunisíBobonaru atu buka meiu ho urjente hodi halo normalizasaun ba mota Osola.
“Bee sa’e ne’e tanba nia kauza ne’e mota aas liu fali uma, entaun ita haree ba tempu oin mai nia impaktu sei iha. Ita presiza ekipamentu balun para bainhira udan mai ne’e labele mosu tan inundasaun. Ha’u alerta mós ba komunidade iha ne’e, karik udan-boot labele hela iha ne’e, sai bá buka fatin seguru, nune’e ita labele sai vítima ba dezastre naturál”, dehan.
Tuir observasaun jornalista Tatol, korrente bee-mota sobu estraga mós muru protesaun ne’ebé Governu konstrui iha tinan hirak liubá.
Notísia relevante: Uma-kain 20 iha Bobonaro vítima ba dezastre naturál
Jornalista: Sergio da Cruz
Editora: Maria Auxiliadora
