DILI, 11 Desembru 2025 (TATOLI)-Vise-Ministru ba Fortalesimentu Institusionál, José dos Reis Magno, informa inisiu lansamentu programa Wolbachia hahú iha Agostu no sei ramata iha Desembru 2025, maibé Ministériu Saúde ho Menzies sei estende to’o 31 Janeiru 2026.
Notísia Relevante: Programa Wolbachia: Menzies no MS husik ona susuk liu rihun 56 iha Dili
“Ita sei estende atu bele masimiza ita-nia intervensaun sira-ne’e ita terrenu. Iha mós komunidade nia preokupasaun, maibé foin lalais diresaun jerál kuidadu saúde primaria enkontru ona ho autoridade munisípiu Díli sira aseita ona kontinua husik susuk to’o janeiru,” Jose Magno hateten ba jornalista sira iha Bidau Tokoh Baru, ohin.
Nia informa, programa Wolbachia hanesan meiu ida-ne’ebé atu kombate moras dengue iha rai ida-ne’e programa ne’e rasik nasaun avansadu 15 sira hanesan Indonézia, Austrália no rai seluk mós uza ona.
Nia mos hateten, tinan hirak liu ba kazu dengue maka’as loos, maibé estratéjia lubuk ne’ebé Governu halo ikus-ikus ne’e komesa halo redusaun ona ba kazu dengue.
“Iha loron 31 Janeiru ramata mak sei halo teste maizumenus rezultadu teste to’o fulan neen nia laran,” nia dehan.
Jornalista : Felicidade Ximenes
Editór : Cancio Ximenes
