DILI, 12 Dezembru 2025 (TATOLI)-Parlamentu Nasionál (PN) kontinua apoia Governu halo negosiasaun ba fronteira marítima no terrestre entre Timor-Leste (TL) no Indonézia.
Xefe bankada Partidu Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, elojia Governu ne’ebé hatudu vontade buka kompleta duni soberania país nian.
Nia louva ekipa negosiadór delimitasaun fronteira terrestre no marítima ne’ebé lidera husi Primeiru-Ministru, Xanana Gusmão, nu’udar líder nasionál ne’ebé ho hanoin ba país ida ne’ebé harii kompletamente ho ninia fronteira marítima no terrestre.
“Iha progresu di’ak bele lori sinál pozitivu ba timoroan hotu. Ezijénsia kona-ba fronteira, parese sei iha tan faze ida, ita hotu hein katak prosesu sira hotu tuir ita-nia espetativa”, nia hateten iha Parlamentu, ohin,
Deputadu ne’e husu ba sidadaun hotu atu fó apoiu tomak ba polítika Governu nian iha prosesu ne’e no husu mós atu kria pás.
Vise bankada Partidu Frente Revolusionária Timor-Leste Independente (FRETILIN), David Dias Ximenes, konsidera kestaun fronteira ne’e importante, tanba país ho Indonézia iha fronteira terrestre no marítima.
Deputadu opozisaun ne’e otimista katak negosiasaun hotu sei lori duni rezultadu di’ak ba povu hotu. “Embaixadór Timor-Leste iha Jakarta dehan sai ona katak fronteira sei respeita nafatin pilár ne’ebé uluk koloka ona. Tanba ne’e, ha’u optimista katak sei laiha problema boot ida, uluk ita iha ne’e iha fali estaka foun. Entaun, ohin loron konsensu iha, respeita de’it fronteira ne’ebé uluk husi Portugál no Olanda nian”, realsa.
Xefe bankada KHUNTO, António Verdial de Sousa, apoia Governu no fiar prosesu negosiasaun ne’ebé daudaun la’o, liuhusi prosesu naruk hodi apoiu xefe negosiadór ne’ebé halo esforsu másimu ba kestaun ne’e.
Lembra katak negosiasaun delimitasaun fronteira marítima segunda ronda ne’ebé hala’o iha Jogjakarta, iha 10 Dezembru ne’e, lori satisfasaun ba ekipa negosiadór husi Timor-Leste no Indonézia, tanba konsege ko’alia ba malu ho di’ak hodi simu ideia no iha vontade atu avansa ba etapa tuirmai.
Negosiasaun formál primeira ronda hala’o iha fulan-Agustu 2025, iha Dili, no segunda ronda iha Jogjakarta. Ekipa konkorda ona atu kontinua negosiasaun formál tuirmai iha Abríl 2026.
Enkuantu negosiasaun formál segunda ronda kona-ba fronteira marítima iha Jogjakarta hala’o durante loron-tolu, husi 08-10 Setembru 2025, no taka ho asina akta husi xefe delegasaun nasaun rua nian.
Notísia relevante: https://tatoli.tl/2025/12/11/xanana-hau-espera-negosiasaun-tuir-mai-iha-abril-2026/
Jornalista: Nelson de Sousa
Editora: Maria Auxiliadora
