OEKUSI, 12 Dezembru 2025 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), kinta ne’e, fó sai liuhusi konferénsia imprensa, informa ba públiku atu kria pás, estabilidade no trankuilidade durante selebrasaun loron natál no tinan foun.
Tanba ne’e, Komandante PNTL RAEOA, Superentendente Asistente Polísia, Angelo Quelo, apela ba komunidade iha territóriu Oekusi liu-liu joven sira presiza fó liman ba malu no prepara an atu simu natál no tinan foun ho ambiente pás, armonia hodi hamutuk família festeza tinan foun ho dame.
Notísia relevante:Tinan ne’e, PNTL Oekusi rejista kazu abuzu seksuál kontra minoridade 26
Autoridade seguransa ne’e subliña, daudaun komandu PNTL Oekusi simu ona orientasaun ka diretiva husi komandu nasionál, no mós hatuun ona despaixu ba iha parte operasaun atu dezenvolve diretiva ne’e.
Nune’e bele fahe tarefa serbisu ba sesaun hotu, hahú husi komandu to’o eskudra sira inklui Polísia Unidade Patrollamentu Fronteira (UPF), Batalaun Orden Públika (BOP), Polísia Unidade Marítima (UPM) no Forsa-Defeza Timor-Leste (F-FDTL) destakadu sira iha Oekusi inklui serbisu migrasaun.
“Antes fahe tarefa serbisu, ita sei halo enkontru konjunta hafoin ita distribui planu ba preparasaun, maibé komandu PNTL Oekusi ho forsa destakadu sira, preparadu atu asegura festa natál no tinan foun, nune’e movimentu komunidade bele livre, seguru no trankuilidade laiha perturbasaun no mós laiha ema ida ka grupu ida impede ita-nia komunidade sira-nia movimentu durante oras 24,” nia afirma liuhusi konferénsia imprensa hala’o iha komandu PNTL Oekusi, ohin.
“Alerta ba públiku espesialmente iha Oekusi, katak perturbasaun ne’ebé mak halo husi pesoál ka grupu, ita konsidera hanesan autór, sei prosesu tuir lei, no la tolera sé de’it mak hakarak disturbu iha tempu natál no tinan foun,” nia promete.
Aleinde ne’e mós, Komandante Quelo, informa ba públiku, katak komandu PNTL bandu totál sidadaun ne’ebé tenta atu importa fugete liuhusi fronteira, no bandu atu sunu fugete iha bairru sira antes loron natál no tinan foun.
“Ita-nia planu, ita lakohi perturbasaun sira akontese, nune’e ita orienta ona ba iha Ofisiál Polísia Suku (OPS) no parte hotu, atu buka tuir individu no grupu balun gosta halo baralla iha bairru laran, liu-liu sunu fugete, iha semana kotuk ita prende ona balun hatama fugete liuhusi fronteira, serbisu sekreta sira mak deteta oras ne’e iha ona prosesu, ne’ebé ita kontinua nafatin, no ita sei mobiliza tama sai bairru atu halo atuasaun, tanba sunu fugete só iha tempu kalan natál no tinan foun, informasaun sira-ne’e, ita mós koordena ona ho autoridade lokál sira atu tau matan mós ba iha suku no aldeia sira, ita mós sei fó sai aviza ofisiál, nune’e ema hotu kumpre,” nia fó hanoin.
Notísia Relevante:PNTL Oekusi ofisializa estatutu no rejimentu internu juventude bairru Numbei
Atu garante seguransa iha Oekusi, komandu PNTL Oekusi prepara ona membru efetivu 127, no sei hetan apoia másimu husi forsa destakadu sira iha Oekusi, atu asegura festa natál no tinan foun iha Oekusi.
Jornalista: Abílio Elo Nini
Editór: Rafael Ximenes de A. Belo
