OEKUSI, 11 Agostu 2025 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), segunda ne’e, ofisializa estatutu no rejimentu internu husi Organizasaun Juventude Bairru Numbei, iha aldeia Sanane Suku Costa sub-rejiaun Pante Makasar kona-ba estabelesimentu regra no prosedimentu tara-bandu ba joven sira iha bairru referidu atu kria estabilidade no paz iha bairru laran.
Notísia relevante:PNTL bolu urjente líder arte-marsiál no KRAM bá kazu hana malu iha Oé-Cusse
Konselleiru Organizasaun Juventude Bairru Numbei, Martinho Abani Elo, esplika, rejimentu internu ne’e nu’udar matadalan ba primeiru asembleia juventude Bairru Numbei, ho périodu tinan-haat, hahú iha loron 30 Jullu sei termina iha loron 30 Jullu 2028, ho nia estatutu iha kapítulu XI artigu 17.o no rejimentu internu juventude iha kapítulu X artigu 27.o.
Ho nia vizaun, primeiru atu hasa’e kualidade pesoál, karakteristiku no responsabilidade iha aspetu oioin inklui intelektuál, étika no talenta, daruak juventude tenke iha kapasidade atu kompete iha área oioin. Datoluk juventude tenke iha mudansa ativu atu dezenvolve país no nasaun, ikusliu juventude tenke iha konsiénsia kona-ba valór solidaridade, serbisu hamutuk, dame no unidade.
Misaun dahuluk, atu hasa’e kualidade edukasaun no partisipa ativu iha atividade Suku, aldeia no bairru. Organizasaun juventude oportunidade atu dezenvolve kapasidade liuhusi talenta no desportu. Fó suportu no formasaun kona-ba setór produtivu. Dezenvolve valór kultura no Tau matan ba meiu-ambiente.
“Estabelese regra tara-bandu ne’e, hetan ona aprovasaun husi komandu PNTL RAEOA, lia-na’in, juventude no mós autoriedade lokál suku Costa, rejimentu interna ne’e hamutuk kapítulu 10 ho artigu 27 o, hodi regula atividade iha bairu laran mak hanesan labele tuur iha estrada ibun iha kalan boot, labele loke muzika iha kalan boot, labele tuda malu, labele book ema nia oan feto arbiru, no mós labele halo violénsia iha uma laran,” nia ko’alia iha ámbitu seremónia agradesimentu hala’o iha bairru Numbei, domingu kalan ne’e.
Nia informa, iha estatutu no rejimentu internu ne’e, sita sansaun todan no kama’an, karik komete rejimentu referidu mak sei multa osan husi dolár $25 to’o dolár $50, enkuantu sansaun todan hahú husi dolár $150 to’o $1000 inklui oho karau ida no fahi, no mós multa tua ho kaixa.
Notísia relevante:2024, PNTL Oé-Cusse rejista kazu 596 no na’in-11 tama prizaun
Iha biban ne’e, Komandante PNTL Oekusi Supetintendente Asistente Polísia, Angelo Quelo, apresia ho insiativa juventude no komunidade sira, bele estelebese regra tara-bandu iha bairu laran.
Nia konsidera, regra ne’e importante atu bele kontrola juventude sira, tanba durante ne’e bairru Numbei sai hanesan risku ba problema entaun regra ne’e bele kesi joventude sira-ne’ebé kria konflitu.
Nune’e nia rekomenda, ba xefe juventude atu bele kontrola joven sira kuandu la kumpre regra tara bandu nian bele informa ba PNTL hodi halo atuasaun.
“Lori komandu nia naran hato’o parabéns, tanba ne’e bele kontribui ona seguransa nian iha Oekusi, rejimentu ne’e, ha’u lee no aprova ona, tan ne’e ha’u husu mai hamutuk promove pás iha Oekusi,” nia apela.
Notísia relevante:Komandu PNTL nomea Inspetór Xefe Angelo Quelo ba Komandante Interinu Oekusi
Prezidente sub-Komisaun Reguladora Arte Marsiál (KRAM) Oekusi, Zeferino da Cruz Sa’u, hateten, estabelese regra tara-bandu ne’e importante, hodi hakesi juventude sira evita aan husi problema, nune’e bairu Numbei bele livre husi konflitu.
“Xave ba joven sira mak kaer-metin kultura Oekusi nian, dezde uluk to’o jerasaun ba jerasaun mak, hatene ta’uk, moe, solidariedade ba malu no respetu malu, ida-ne’e mak abut nu’udar Oekusi nian, ne’ebé KRAM konsidera inisiativa ne’e pozitivu tebes atu kesi alin sira, atu hado’ok husi krime oioin,” nia dehan.
Jornalista: Abílio Elo Nini
Editór: Rafael Ximenes de A. Belo
