OÉ-CUSSE, 29 agostu 2023 (TATOLI – Komdandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), segunda ne’e bolu urjente líder oragnizasaun arte-marsiál sira hamutuk ho Komisaun Reguladora Arte Marsiál kona-bá akontesimentu kazu hana malu iha aldeia Oésono, suku Costa, sub-rejiaun Pante Makasar.
“Kazu ne’e seidauk indika loloos maibé ein-jerál, ita konsidera mós lidér arte-marsiál sira hodi bolu atensaun, tan ne’e maka ita bolu lidér arte-marsiál sira ho KRAM halo enkontru urjénsia atu halo prevensaun, tanba akontesimentu sira hanesan ne’e, keta envolve mós membru balu iha laran,” Komdandante PNTL Rejiaun Oé-Cusse, Superintendente Nicolau Francelino da Costa, ba Tatoli iha Oé-Cusse, tersa ne’e.
Komandante ne’e observa, kazu hana malu ne’e, foin mak akontese primeira-véz iha Oé-Cusse, tanba durante ne’e, PNTL akompaña iha rai mak sempre akontese, ataka malu malu no hana malu, maibé Oé-Cusse nunka, maibé primeira-vez akontese iha 2023 ne’e.
“Tan ne’e maka komandu iha inisiativa hodi bolu urjentimente líder arte-marsiál sira hamutuk ho KRAM, mezmu kazu ne’e ita seidauk indika, katak komete hosi arte-marsiál, maibé jerálmente ita bolu kedas atensaun hodi kontinua hametin pás no estabilidade iha rejiaun ne’e rasik,” nia katak.
Tuir nia, planu prioridade ba futuru, PNTL sei halo enkontru kada fulan hamutuk ho líder arte-marsiál sira, KRAM, veteranu, ho objetivu atu fó hanoin nafatin labele repete tán problema iha futuru mai.
Tuir informa, daudau ne’e mós komandu fó atensaun ba Ofisiál Polísia suku atu kontinua servisu hamutuk ho autoridade lokál sira, joventude no veteranu iha suku, para kontinua fahe informasaun liuhosi seremónia kulturál sira, nune’e ema hotu bele kontribui ba pás no dame.
“Tanba ita-nia OPS sira maka loron-loron hamutuk ho komunidade sira iha baze, entaun komandu mós kontinua fó hanoin atu koopera malu iha entidade sira iha suku, nune’e Oé-Cusse bele hakmatek,” ni katak.
Notísia relevante: PNTL asegura autór prinsipál hana joven iha Oésono RAEOA
Jornalista: Abílio Elo Nini
Editór: Evaristo Soares Martins
