PNTL asegura autór prinsipál hana joven iha Oésono RAEOA
OÉ-CUSSE, 28 agostu 2023 (TATOLI – Komdandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), asegura ona autór prinsipál ne’ebé deskonfia hana joven ida ho naran inisiál AH iha bairru Sumlili, aldeia Oésono, suku Costa, sub-rejiaun Pante Makasar.
Komdandante PNTL Rejiaun Oé-Cusse, Superintendente Nicolau Francelino da Costa, informa, kazu ne’e akontese iha loron sesta, 25 agostu, iha tuku 20:28 kalan, rezulta joven ida ho inisiál AH hetan kanek grave iha liman kabun tanba hetan hana ho rama-ambon hosi ema dezkoñesidu.
Nune’e, iha kalan ne’e PNTL hamutuk ho F-FDTL halo kedas intervensaun hakalma situasaun no evakua kedas vítima ba halo tratamentu iha ospitál referál Oé-Cusse.
“Evidénsia no deklarasaun hosi ema-ne’ebé maka deskonfia hana joven ida iha Sumlili ne’e, balu ami foti hotu ona, no suspeitu ne’ebé sai hanesan autór prinsipál ba kazu ne’e iha ona komandu nia liman, liuliu iha investigasaun kriminál, hodi aselera lalais nia prosesu, hodi aprezenta ba iha Ministériu Públiku,” Nicolau Francelino da Costa, ba Tatoli iha Oé-Cusse, segunda ne’e.
“Suspeitu agora daudaun iha komandu nia liman, maibé ami labele publika nia identidade no envolve ema na’in-hira, hosi organizasaun ne’ebé, tanba ne’e segredu justisa, ami labele ko’alia sai detalla, maibé ami sei aprezenta direita ba na’in ba prosesu iha Ministériu Públiku,” nia informa.
Tuir nia, kronolojia hosi kazu ne’e, seidauk koondena parte ida, tantu arte-marsiál ka ema individuál, tanba prosesu investigasaun sei la’o hela.
“Kuandu tama ona ba prosesu iha tribunál, ita foin hatene motivu kazu ne’e oinsá, hosi ema individu ka arte-marsiál ka hosi parte ne’ebé, autór ne’e mós la autoriza ba família, agora sei asegura iha PNTL hodi submete ba prosesu,” nia katak.
Tuir informasaun ne’ebé Agência Tatoli asesu iha terrenu katak, kronolojia akontesimentu ne’e akontese bainhira vítima AH tur hela iha estrada rotunda Sumlili hamutuk ho nia kolega na’in-neen.
Derrepente motorizada rua, mai hosi parte loromonu halai ho velosidade neineik, hafoin besik vítima autór ida tur iha kotuk maka hana, uza fiska ho rama-ambon, hodi husik kona loos, vítima nia liman kabun.
Jornalista: Abílio Elo Nini
Editór: Evaristo Soares Martins
