BOBONARU, 12 Dezembru 2025 (TATOLI) – Implementasaun projetu konstrusaun ba muru protesaun iha mota Bolobu, suku Manapa, postu administrativu Kailaku, munisípiu Bobonaru, seidauk finaliza, nune’e hamosu preokupasaun ba komunidade tanba presaun bee mota nian ne’ebé kontinua aumenta durante tempu udan.
Projetu ne’e konstrui husi empreza Talo Maubuti Unipessoal Lda no Devita Unipessoal Lda.
Rezidente suku Manapa Marta Noronha lamenta katak ai-hun sira iha mota-ninin hetan estragu tanba erozaun, enkuantu distánsia mota bá rezidente sira nia uma falta de’it ona metru 15.
“Ami iha ona perigu nia laran. Iha kalan, ami toba ho ta’uk. Se loron-kalan udan, ami labele toba. Uma ne’e dalaruma labele hela, agora fulan-Dezembru de’it mós hanesan tiha ne’e, satán Janeiru to’o Marsu sira ne’e [bainhira] udan-boot ami toba iha bee-leten de’it ona”, nia hato’o.
Notísia relevante: Autoridade lokál preokupa konstrusaun gabiaun pakote ida iha mota Bulobu paradu
Tanba ne’e, sira hein katak Governu sei foti asaun imediata hodi prevene estragu sira seluk no asegura katak projetu muru protesaun nian hotu tuir nia tempu.
“Maizumenus Estadu buka solusaun ruma, ida sorin ne’ebá salva natar de’it bele, oinsá mak sorin mai ne’e populasaun barak ne’e labele salva? Ne’e boot sira tenke tau-matan atu salva rai-mamuk mak di’ak ka salva povu mak di’ak”, nia haktenik.
Xefe Suku Manapa, Zeferino Loco Berre, afirma katak empreza rua mak hetan knaar hodi halo projetu konstrusaun ne’e, Devita no Talo Maubuti. “Devita nia serbeisu seidauk hotu bee komesa fó presaun iha dadeer no lokraik, sesaun ida husi kompañia Talo Maubuti sobu, bee ne’e tebe ba fali Devita nia sobu hotu. Ne’e problema boot, ami haree katak Devita nia ne’e la’o tarde loos, depo’is ida Talo Maubuti nia ne’e foin mak book”, Zeferino lamenta.
Ho situasaun ne’e bele fó ameasa ba infraestrutura sira seluk hanesan ponte Pakistaun, torre eletrisidade, no área rezidensiál sira seluk.
Zeferino subliña mós katak kontratu ba projetu ne’e tenke remata to’o loron 31 Dezembru no husu ba Ministériu Obra Públikaa atu halo presaun ba empreza atu aselera obra. “Se la hotu iha tinan ne’e, signifika empreza sei la hetan susesu”, dehan.
Jornalista Tatoli tenta halo konfirmasaun ba asuntu ne’e ho empreza Devita no Talo Maubiti, maibé la konsege, ekuantu ekipamentu pezadu husi kompañia rua ne’e kontinua serbisu iha mota laran atu sátan bee-mota.
Obra ne’e ho distánsia kilómetru ida-resin neʼebé responsabliza husi Devita ho montante $618.618,22 ba durasaun kontratu to’o Novembru 2025 no pakote ida Talo Mabuti mak responsabiliza ho valór kontratu $532.503,81 no durasaun serbisu la deskreve iha kuadru avizu.
Notísia relevante: Empreza Lesuburo garante finaliza konstrusaun gabiaun iha mota Bulobu tuir kontratu
Jornalista: Sergio da Cruz
Editora: Maria Auxiliadora
