DILI, 15 Dezembru 2025 (TATOLI)—Ministériu Edukadaun liuhusi Ministra Edukasaun, Dulce de Jesus hamutuk ho ekipa Unidade Kurríkulu Nasionál hala’o enkontru kortézia ho Vise Primeiru-Ministru Interinu, Mariano Assanami Sabino, hodi relata rezultadu ezame nasionál tinan 2025 molok aban anúnsia ba públiku.
Notísia Relevante: ME seidauk finaliza validasaun ajustamentu valór ezame nasionál
Ministra Edukadaun, Dulce de Jesus, hateten enkontru kortézia ne’e atu hetan orientasaun ruma husi Primeiru-Ministru interinu hanesan mós Ministru Koordenadór Asuntu Sosiál ne’ebé Ministra Edukasaun tutela ba, antes anúnsia rezultadu ba públiku.
“Ida ne’e ami hanoin katak importante tebes ami atu relata informasaun ba servisu tomak ne’ebé Ministrériu Edukasaun hali durante tinan ida-ne’e nia laran,” Ministra Dulce informa ba jornalista sira iha Palásiu Governu, ohin.
Governante ne’e dehan, hanesan baibain katak servisu importante liu mak ME tenke hetan rezultadu di’ak ida ba estudante sira, nune’e rezultadu tinan ida-ne’e amostra iha avansa husi dezempeñu estudante inklui manorin sira.
“Maibé atu husu ba profesór sira inklui komunidade edukativa hanesan inan-aman no estudante sira atu haka’as-an liután nune’e iha tinan oin bele iha rezultadu ne’ebé mak di’ak liután. Informasaun detalladu ami sei fó sai aban, tanba ohin ami mai aprezenta de’it,” nia dehan.
Iha biban ne’e, Primeiru-Ministru Interinu, Mariano Assanami Sabino, hateten husi parte Governu husu inan-aman no profesõr sira atu hotu-hotu koopera, ohin avalia ona karik iha estudante ida rua mak laliu ne’e tanba dalabarak estudante mai tuir de’it ezame, entaun labele hanesan ne’e.
“Tamba edukasaun atu forma ema sai ema, forma ho aspeitu oioin la’ós ho valór orientíka de’it ka atu hetan valór de’it, maibé tenke forma ho didi’ak tanba ne’e tenke ho dixiplina, aprende ho másimu no ativa iha eskola,” Xefe Governu interinu ne’e apela.
Jornalista : Alexandra da Costa
Editór : Cancio Ximenes
