OEKUSI, 15 Dezembru 2025 (TATOLI) – Hahú husi fulan-Janeiru mai to’o Novembru 2025, Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), rejista kazu hamutuk 333 maihusi kazu tipu haat, no na’in-13 konsege tama prizaun.
Komandante PNTL RAEOA, Superentendente Asistente Polísia, Angelo Quelo, informa, husi kazu 333 ne’e, iha tipu haat no no kazu aas liu mak kazu violénsia doméstika.
“Tinan ne’e ita rejista kazu 333. Primeiru kazu ne’ebé rejista barakliu mak violénsia doméstika hamutuk 164, daruak kazu asalta malu númeru sa’e 66, datoluk kazu kontra-bandu 27 no kazu asediu seksuál 26,” Angelo Quelo relata ba jornalista sira iha Oekusi, ohin.
Autoridade polisiál ne’e informa, kazu 333 ne’e, parte PNTL liuhusi seksaun investigasaun kriminál enkamiña hotu ba iha Ministeriu Públiku hodi prosesa ba tribunál no balun hetan ona alegasaun pena balun sei iha mandamentu prosesu.
“Maibé husi kazu 333 ne’e, arguidu na’in-13 mak oras ne’e sei kontinua kumpre hela prizaun, inklui sidadaun estranjeiru na’in-neen, tanba komete kazu jogu online burla inrormatika iha otél Oé-Upun,” nia afirma.
Komandante ne’e, subliña, esforsu ne’ebé PNTL hala’o nia kna’ar ba kazu sira-ne’e mak liuhusi prevensaun. Prevensaun ne’e realiza liuhusi sistema polísia komunitária ba sensibilizasaun no sosialiazasaun alvu ba suku no aldeia sira, la’ós polísia de’it maibé husi parseiriu Organizasaun Naun Governamentál (ONG) mós hala’o atividade hanesan, atu oinsá bele hamenus no prevene situasaun ne’e.
“Ita sei kontinua tanba PNTL nia serbisu ativu, tama bairru sira-ne’ebé konsidera risku tanba númeru kazu sira-ne’e rejista maka’as kada trimestre. Maibé problema seluk, númeru efetivu PNTL iha Oekusi menus, ita la’ós ejize ba komandu maibé ami nafatin esforsa, utiliza rekursu ne’ebé iha. Ami kontinua la’o hodi halo prevensaun atu kombate krime sira-ne’ebé sempre baralla iha komunidade nia leet,” nia garante
Notísia relevante:Suku Naimeko ho Bobokase iha Oekusi implementa ‘tara-bandu hakribi violénsia’
Entretantu, totál membru PNTL ativu iha Komandu PNTL Oekusi hamutuk na’in-127, ne’ebé kolokadu iha kuartel PNTL rejionál, no eskuadra sira iha sub-rejiaun haat inklui Ofisiál Polísia Suku 20.
Jornalista: Abílio Elo Nini
Editór: Rafael Ximenes de A. Belo
