Ramos-Horta: “Primeiru-Ministru la ko’alia mai ha’u atu halo remodelasaun”
DILI, 16 Dezembru 2025 (TATOLI)–Prezidente Repúblika, José Ramos-Horta, informa durante ninia mandatu ne’e Primeiru-Ministru, Kay Rala Xanana Gusmão, nunka diskutr kona-ba remodelasaun ruma ba Governu.
Notísia Relevante: PR Horta dekreta lista IX Governu
Xefe Estadu hato’o asuntu ida-ne’e relasiona ho preokupasaun ne’ebé mosu iha públiku katak iha tempu badak nia laran ne’e sei iha remodelaaun ba Governu Konstitusionál da-sia (IX) ne’ebé lidera husi Primeiru-Ministru Kay Rala Xanana Gusmão.
“Isu remodelasaun ne’e la loos. Primeiru-Ministru nein dala ida, ha’u-nia mandatu ba tinan tolu (3) ona, nia nein ko’alia mai ha’u atu halo remodelasaun ruma ba Governu, laiha liu. Ha’u mós la ko’alia ba Primeiru-Ministru atu halo remodelasaun, ne’e kompetensia Primeiru-Ministru nian,” Prezidente Ramos-Horta hateten ba jornalista sira iha Palásiu Prezidensiál Nicolau Lobato, bairru Pite, ohin.
Nia dehan, bainhira Primeiru-Ministru Kay Rala Xanana Gusmão hakarak halo remodelasaun depende ba nia tanba ida-ne’e Xefe Governu nia kompeténsia.
“Bainhira Primeiru-Ministru hakarak halo remodelasaun, ne’e kompetensia ninin, ha’u la mete to’o ne’ebá. Iha mundu remodelasaun normaá, maibé ba Governu ida-ne’e atu halo remodelasaun tarde ona,” nia dehan.
Notísia Relevante: Kaleidoskópiu 2023: Lejizlatura Daneen PN aprova programa IX Governu, OR-OJE 2024
Jornalista : Hortencio Sanchez
Editór : Cancio Ximenes
