VIKEKE, 20 Dezembru 2025 (TATOLI)-Prezidente Autoridade munisípiu Vikeke, Francisco C.S de Gonzaga Soares, hamutuk ho autoridade Uatulari, inaugura ponte ida, iha aldeia Sana, suku Uaitame, postu administrativu Uatulari.
Francisco Soares haktuir katak obra ne’e husi Programa Nasionál Dezenvolvimentu Suku (PNDS), ne’ebé bele fasilita estudante sira husi Ensinu Báziku Filiál (EBF) Ualake asesu bá eskola, liuliu iha tempu udan, aleinde ne’e komunidade bele halo movimentu.
“Ohin PNDS suku konklui ona obra PNDS ba tinan 2025, nune’e ha’u hakarak husu ba populasaun sira hotu tau matan no kuidadu ponte ne’e, pelumenus ponte ne’e dura ba tinan 10, depois mak ita reabilita”, Francisco Soares hateten iha ámbitu inagurasuan ponte Sana.
Dirijente ne’e mós husu ba parte tékniku PNDS kontinua tau matan ba obra sira, atu projetu ne’e konklui tenke ho kualidade. “Ita tenke garante ba kualidade tanba hakarak dezenvolvimentu sira-ne’e mai ho kualidade hodi povu utiliza”, nia hato’o.
Diretór PNDS munisípiu Vikeke, Francisco S. Varela, agradese ba autoridade suku no ekipa PNDS ne’ebé konklui obra ne’e, maski haosru dezafiu oioin.
“Ha’u hakarak husu parabéns ba suku Uaitame tanba bele konkluidu obra tuir tempu ne’ebé ita determina. Ida-ne’e sai hanesam ezemplu di’ak ba ita-nia suku seluk ba implementasaun obra PNDS iha Uatulari. Espera ba oin postu Uatulari nafatin hatudu ezemplu di’ak ba iha munisípiu Vikeke”, nia subliña.
Prezidente ekipa servisu PNDS iha suku Uaitame, Salvador Fernandes, hateten projetu PNDS ba tinan 2025 iha suku Uaitame perioriza rua mak ponte no halo reabilitasaun ba bee-matan Foho-Manu. Obra sira ne’e konklui 100%.
Kona-ba obra konstrusaun ponte Sana ho medida naruk metru 7 ho nia luan metru 4,50 konstrui ho orsamentu PNDS ba tinan 2025 ne’ebé aloka ba suku Uatame ho totál $25.945,13, iha ne’ebé ba konstrusaun ponte ho gastu hamutu $22.053, 38 no ba manutensaun bee-moos iha aldeia Foho-Manu $3.387,50.
Partisipa iha serimónia inagurasaun obra PNDS iha aldeia Sana mak autoridade lokál, veteranu, profesór, estudante no kuminidade suku Uaitame.
Notísia relevante: https://tatoli.tl/2025/09/19/ebf-ualeke-uaitame-menus-saladeaula-difikulta-prosesu-aprendizajen/
Jornalista : Vitorino Lopes da Costa
Editór :
