BOBONARU, 22 Dezembru 2025 (TATOLI)-Komandante Eskuadra Polisía Nasionál Timor-leste (PNTL), postu administrativu Bobonaru, munisípiu Bobonaru, Asistente Superintendente Constantino Domingos de Carvalho, husu ba komunidade atu kria pás no mantein orden públika durante selebrasaun festa natál no tinan foun 2026.
Nia dehan Ofisiál Polísia Suku (OPS) sira fahe ona avizu husi Komandu Munisípiu Bobonaru ba suku 18 iha postu Bobonaru atu prevene konflitu hodi kria estabilidade.
Notísia relevante: PNTL Oekusi la tolera grupu ka individu halo perturbasaun iha natál no tinan foun
“Ha’u husu ba inan-aman sira atu fó hanoin ba oan sira, liuliu mane sira atu durante natál no anu novu labele halo perturbasaun orden públika. Karik la halo tuir maka nia sei simu konsekuénsia. Ha’u la’ós ko’alia de’it no ameasa, tanba ita iha hanoin ida hakarak moris iha pás nia-laran. Ita postu administrativu Bobonaru tenke hatudu ezemplu”, nia hateten iha sede suku Atuaben, foin lalais ne’e.
Aleinde ne’e, Xefe Suku Tapo, Xavier Cardoso, solisita ba komunidade, liuliu joven sira atu kumpre regulamentu hirak ne’e. “Ha’u hanesan líder komunitáriu apela ba joven sira atu unidade ba ita hotu”, nia hato’o.
Antes ne’e, Komandu Polísia Bobonaru, lideradu Superintendente Xefe Agustinho Gomes da Silva, hasai ona karta avizu Nu: AL/01/X11/2025 “Prevene Konflitu hodi Kria Seguransa no Estabilidade, Pás no Orden Públika iha área Autoridade Munisípiu Bobonaru durante períodu Adventu, Natál 2025 no Anu Novu 2026”.
PNTL – Komandu Polísia Bobonaru hasai avizu ho dispozisaun hirak mak 1. Avizu ba komunidade hotu, espesialmente juventude sira iha área Autoridade Munisípiu Bobonaru, hahú husi família, bairru, aldeia, suku, postu administrativu no kapitál Maliana atu kontribui hodi garante seguransa, no orden públika iha idaidak nia área.
- Bandu perturba pesoál seluk ne’ebé halao viajen bá-mai iha área hirak ne’ebé mensiona ona, tantu kalan ka loron, tenke respeitu pesoál seluk nia diretu movimentu no fó ajuda kuandu hetan ameasa ou perturbasaun husi indivíduu ou grupu ida.
- Bandu tuur hamutuk iha grupu ne’ebé liu husi ema na’in-rua iha estrada ninin, área públiku no espesialmente área sira ne’ebé risku ba krime no perturbasaun orden públika iha tempu kalan, sein objetivu ne’ebé klaru.
- Bandu konsumu alkoól iha estrada ninin, área públiku, karreta laran, no durante kondús kareta ou motór.
- Tenke respeitu viziñu sira-nia direitu hodi moris iha trankuilu iha kalan depois oras 21h00 ba leten, no tempu loron liuhusi demonstra atitude toleránsia mutuál, porezemplu labele toka múzika lian boot, hakilar, no sunu fugete besik rezidénsia viziñu iha tempu deskansa no seluk tan.
Notísia relevante: F-FDTL ho PNTL Bobonaro la tolera aktu violentu durante periodu natál no tinan-foun
Jornalista: Sergio da Cruz
Editora: Maria Auxiliadora
