DILI, 23 Dezembru 2025 (TATOLI)–Ministru Interiór, Francisco da Costa Guterres, louva, Forsa Tarefa Konjunta kompostu husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) nia serbisu di’ak tanba konsege prevene konflitu.
“Ita tenke halo prevensaun, tanba ne’e ita la’o, ita halo, dalaruma halo patrullamentu konjunta ita la’o. Ida-ne’e nu’udar meiu ida atu prevene para labele iha problema,” Ministru hato’o ba jornalista sira bainhira partisipa iha avaliasaun anuál PNTL ne’ebé hala’o iha Sentru Formasaun Polísia, Komoro, Tersa ne’e.
Nia esplika, ezistensia Forsa Tarefa Konjunta ne’e bazeia ba Lei Seguransa Nasionál.
“Governu liuhusi rezolusaun ida harii ona Forsa Tarefa, katak forsa F-FDTL liliu Polísia Militár ou Polísia sira ne’e para sira halo patrullamentu konjunta. Mas iha forsa ne’e ita kaer ba Lei Seguransa Nasionál, katak ita kaer prinsípiu seguransa nasionál iha subsidiariedade no komplementaridade,” nia akresenta.
Notísia relevante : PNTL 30 tuir formasaun tátika uza forsa ba prevensaun konflítu
Subsidiariedade no komplementaridade ne’e bazeia ba Lei Seguransa Nasionál, subsidiariedade katak idaidak halo nia funsaun no komplementaridade ne’e katak kuandu ida seluk labele forsa ajuda.
“Mas nia ba hanesan forsa no PNTL. Kuandu haree katak PNTL kbi’it atu laiha halo intervensaun mak presiza oituan apoiu forsa mak forsa bá para apoiu de’it atubele halo atuasaun ida-ne’e de’it,” nia akresenta.
Ministru Interiór hateten, kuandu mosu problema Forsa no Polísia resposta tenke di’ak no lalais para hamate lalais konflitu, nune’e labele mosu hodi alastra tan ba ema seluk ou ba fatin seluk tan.
Forsa Tarefa Konjunta ne’e halo nia funsaun to’o iha loron 06 Janeiru 2026, tanba ne’e Ministru husu ba komumidadade hotu, liliu joven sira atu kolabora ho forsa rua ne’e atubele selebra natál ho di’ak no hakmatek.
Joven kontribui pás no estabilidade
Iha parte seluk, Ministru Interiór husu ba joven sira atu kontribui pás no estabilidade iha ámbitu natál no tinan foun.
“Husu ba joven sira atu kontribui ba pás no estabilidade durante natál no tinan foun ida-ne’e,” nia hameno.
Governante ne’e espera katak situasaun natál no tinan foun la’o iha ‘ambitu hakmatek nia laran.
“Ita lakohi tan ema ida selebra natál no tinan foun lakon nia vida, ita lakohi ida-ne’e. Ita hakarak hotu-hotu tenke selebra ho didi’ak no kontente, hamnasa ho família no labele lakon tan ema ida tanba de’it problema ki’ik koan ida ne’ebé iha, ne’e devia ita tenke rezolve,” nia katak.
Ministru hatutan: ”Husu hothotu atu kolabora no koopera malu, liuliu mós husu ba joven sira bainhira konsumu alkóliku karik halo favór tuir iha ida-idak nia fatin labele sai ba Estrada.”
Jornalista : Natalino Costa
Editora : Julia Chatarina
