DILI, 23 Dezembru 2025 (TATOLI)—Ministru Ensinu Superiór, Siénsia no Kultura, José Honório da Costa Pereira Jerónimo, hateten Reitór Eleitu Universidade Nasionál Timor Lorosa’e (UNTL), Joviano António da Costa, simu pose iha 30 Janeiru 2026.
“Ita sei fó pose ba nia (reitór) iha 30 Janeiru 2026. Nune’e, toma pose hotu nia halo kedas servisu, tanba estrutura foun sei ramata iha 29 Janeiru,” nia dehan ba jornalista sira iha resintu Palásiu Governu, Tersa ne’e.
Ministru ne’e mós husu reitór foun atu kontinua mellora infraestrutura UNTL nian no tenke iha sentidu pertense ba UNTL.
Notísia relevante: Joviano António da Costa eleitu sai Reitór UNTL
“Ha’u-nia dezeju mak nia servisu nafatin ho ministériu atubele kontinua mellora UNTL ba futuru,” nia informa.
Iha fatin ketak, Reitór Atuál João Soares Martins, husu reitór eleitu atu kontinua lori universidade bá-oin, maski iha dezafiu no limitasaun.
“Atinjimentu ne’e iha ami-nia mandatu, ne’ebé reitór foun ho estrutura foun bele kontinua. Sira-ne’ebé ladi’ak bele hadi’a di’akliu fali UNTL inklui konteúdu kurríkulu,” nia tenik.
Jornalista: Osória Marques
Editór: Xisto Freitas da Piedade
