BOBONARU,23 Dezembru 2025 (TATOLI)-Autoridade Munisípiu Bobonaru (AMB) inaugura Jardín Setembru Negro iha Maliana Vila hodi loke ofisialmente ba públiku.
Obra ne’e hanesan faze inísiu ida oinsá atu kria espasu verde barak iha kapitál Maliana.
Prezidente Autoridade munisípiu Bobonaru, Paulo Moniz Maia, husu ba públiku atu kuída instalasaun no ai-horis ne’e kuda hodi hamatak no hafurak liután jardín ne’e.
Notísia relevante: Autoridade Bobonaru lansa fatuk dahuluk ba konstrusaun Jardín 08 de Setembro Maliana
“Laiha ema ida atu estraga, ita hotu tau-matan, kontribui hanoin di’ak, nune’e ita bele partisipa dirita no indireta. Ami mós sei hasai sirkulár ida, tau iha kuadru avizu hakerek pontu ida ka rua. Sé mak la kumpri, sansaun saida mak ita bele fó?”, Prezidente Autoridade Bobonaru hateten iha serimónia inaugurasaun ne’e.
Iha sorin seluk, Sekretáriu Autoridade munisípiu Bobonaru, Semedo Laco, agradese ba empreza konstrutora tanba ezekuta obra ne’e tuir duni kalendáriu.
“Ai-horis sira kuda ne’e tenke moris, labele mate, se la rega ai-oan ne’e mate ne’e ema dehan ita mal gastu”, nia afirma.
Administradós postu Administrativu Maliana, Augusto Caetano, esplika katak jardín ne’e tau naran Setembru Negro atu valoriza sakrifísiu juventude lubuk ne’ebé mate iha Setembru 1999, tanba defende ukun-an.
“Momentu ne’ebá Maliana nakukun, tanba ne’e ita tau jardin ne’e hanesan fuan ba munisípiu Bobonaru, maski ema kritika barak, maibé ita kontinua hala’o tanba ne’e mak dezenvolvimentu”, nia realsa.
Diretór empreza Nalo-Bul, Bendito da Conceição Marques, garante katak obra ne’e entrega ho kualidade.
“Ba oin ami-nia responsabilidade laiha ona tanba laiha orsamentu retensaun”, nia realsa.
Obra ne’e implementa liuhusi projetu Planu Dezenvovimentu Integradu Munisipál (PDIM) tinan 2025 ho valór orsamentu $80.999,54.
Notísia relevante: Autoridade Bobonaru sei implementa projetu PDIM 2025 iha tempu badak
Jornalista: Sergio da Cruz
Editora: Maria Auxiliadora
