DILI, 06 Janeiru 2026 (TATOLI)—Ministru Obra Públika (MOP), Samuel Marçal, informa iha fulan-Fevereiru nia laran mak MOP sei kontinua fali projetu melloramentu infraestrutura iha munisípiu sira.
Notísia Relevante: Banku Mundiál fó empréstimu millaun $59 ba konstrusaun estrada Glenu-Letefoho-Hatubuiliku
“Iha Janeiru nia laran, ha’u labele halo lansamentu iha fatin-fatin. Maibé, iha fulan-Fevereiru nia laran, ita sei kontinua fali projetu melloramentu infraestrutura iha munisípiu sira-ne’ebé sai ona alvu,” Ministru Obra Públika, Samuel Marçal, hateten ba Agência Tatoli iha nia kna’ar fatin, Kaikoli, ohin.
Tanba, nia dehan, iha fulan-Janeiru nia laran ne’e MOP sei prioriza reorganiza funsionamentu mákina jestaun administrasaun instituionál hodi garante ezekusaun Orsamentu Jerál Estadu (OJE) 2026 ho di’ak.
“Janeiru ne’e ha’u para lai ho melloramentu infraestrutura nian tanba tinan foun entaun ha’u presiza haree no reorganiza orsamentu ba instituisaun tutelada inklui diresaun sira,” nia dehan.
Governante ne’e dehan, presizae halo reuniaun interna ho dirijente sira para fó instrusaun ba servisu no sei hadi’a tan jestaun administrativa inklui dokumentu sira iha 2025 presiza arkivu ho di’ak.
Aleinde ne’e, nia hatutan, iha Ministériu Obra Públika rasik sei hasai funsionáriu balun ne’ebé reforma obrigatóriu inklui funsionáriu hirak ne’ebé latama kategória reformadu maibé ladun ativu no la dixiplina iha servisu.
“Tanba ida-ne’e rekomendasaun no orientasaun husi Primeiru-Ministru inklui KFP, dadus hirak ne’e ha’u entrega ona ba Rekursu Umanu atu halo avaliasaun tanba Estadu fó osan maibé sira la obedese ba kontribuisaun. Kona-ba totál ema hira ne’e ha’u seidauk simu relatóriu finál husi Rekursu Umanu,” nia informa.
Entretantu, bainhira hapara funsionáriu balun husi dirasaun sira normalmente sei halo mós rekrutamentu foun ba funsionáriu bainhira dirasaun presiza reforsa ba funsionamentu servisu, maibé buat sira-ne’e hotu sei tetu tanba bainhira ema barak liu servisu balun ladun efisiénsia no laiha kontrolasaun ba malu.
Notísia Relevante: MOP konsidera reabilitasaun estrada Ataúru atu promove setór turizmu
Jornalista : Alexandra da Costa
Editór : Cancio Ximenes
