Janeiru-Setembru, MAPPF kontribui reseita rihun $163
DILI, 06 Janeiru 2026 (TATOLI) – Ministériu Agrikultura, Pekuária, Peska no Floresta (MAPPF) rekolla, husi Janeiru to’o Setembru 2025, reseita hamutuk $163.269,66 ba kofre Estadu.
Diretór Nasionál Planeamentu iha MAPPF, Faustino Tibúrcio Guterres da Silva, hateten reseita ne’e mai husi kategoria lima mak hanesan abastamentu animál iha Matadouru Nasionál Tíbar, importasaun produtu agríkola, lisensa peska komersiál no naun komersiál, no reseita doméstika serbisu aprovizionamentu.
“Iha ministériu ami la’ós gasta de’it osan, maibé mós kontribui reseita ba Estadu maski uitoan”, Faustino Tibúrcio dehan ba Tatoli, ohin.
Nia esplikak katak reseita ne’ebé sira rekolla foin to’o de’it Setembru, tanba fulan tolu ikus nian ne’e diresaun balun seidauk hatama dadus tanba relasiona ho estrutura ba kargu xefia sira ne’ebé seidauk klaru.
“Iha tinan 2024, hahú husi Janeiru to’o Dezembru, ita rekolla reseita $276.625,33. Nune’e ita sura hamutuk ho tinan ne’e to’o Setembru hetan $439.894,99”, dehan.
Husi reseita sira ne’e, kada tinan kontribui boot liu mak husi produtu Floresta, tanba ema husu tesi ai, halo importasaun ba kutulák no seluk tan.
Notísia relevante: MAPPF rekolla reseita rihun $149 hosi atividade no produtu floresta
Jornalista: Arminda Fonseca
Editora: Maria Auxiliadora
