BOBONARU, 08 Janeiru 2026 (TATOLI) – Agrikultór sira iha postu administrativu Maliana, munisípiu Bobonaru, hahú ona halai natar époka dahuluk tinan 2025-2026.
Natar-na’in iha área Soso, Sidónio Mali, dehan daudaun ne’e hare-oan moris ona no sira prepara hela rai ne’ebé tuir planu atu kuda iha tempu badak.
Notísia relevante: Bobonaru rejista rezultadu di’ak iha produsaun hare iha époka 2025
“Tinan uluk tempu hanesan ne’e ami kuda tiha ona. Tinan ida-ne’e ami tarde uitoan tanba udan-been ladún di’ak. Iha Dezembru nia laran to’o agora mós udan la tau-maka’as ida”, nia relata ba Tatoli, ohin.
Suzana de Jesus, natar-na’in mós reforsa katak tratór ne’ebé sira uza fila rai balun sosa rasik no balun apoia husi Diresaun Servisu Munisipál Agrikultura Bobonaru.
“Tinan-tinan ami sempre hetan apoia tratór no fini hodi ajuda ami hasa’e produsaun hare. Tinan uluk rezulta di’ak, más tinan ne’e ladún hatene tanba udan-been ladún di’ak”, dehan.
Atu garante aktividade agrikola la’o ho di’ak, Prezidente Autoridade Munisípiu Bobonaru, Paulo Moniz Maia, orienta ona empreza internasionál Minarta atu kontinua fornese bee ba natar, maski projetu la’o hela.
“Sira dehan bee iha kanu ki’ikoan kontinua tama, tanba ita lakohi komunidade iha tinan ida ne’e la halo natar. Ita esforsu para natar parte Memu mós bele kontinua kuda hare”, nia afirma.
Tuir dadus husi Diresaun Servisu Munisipál Agrikultura Bobonaru, hare époka dahuluk no daruak tinan 2025 kuda iha área ektare rihun 4 no kada ektare hetan toneladas 3 to’o 5,5.
Notísia relevante: Agrikultór husu MAPPF buka alternativa hodi fornese bee ba natar iha Maliana II
Jornalista: Sergio da Cruz
Editora: Maria Auxiliadora
