Agrikultór husu MAPPF buka alternativa hodi fornese bee ba natar iha Maliana II
BOBONARU, 21 Novembru 2025 (TATOLI) – Agrikultór sira iha suku Tapo-Memo, postu administrativu Maliana, munisípiu Bobonaru, husu ba Ministériu Agrikultura, Pekuaria, Peska no Floresta (MAPPF) atu buka alternativa hodi kontinua fornese bee ba natar partense irrigasaun Maliana II, atu to’os-na’in sira bele halai-natar ba epoka dahuluk 2025-2026.
Agrikultór sira hateten katak to’o agora irrigasaun Maliana II seidauk bele utiliza tanba obra reabilitasaun sei iha hela faze implementasaun.
Natar-na’in Santana de Jesus solisita ba MAPPF oinsá atu buka solusaun, nune’e bee kontinua tama bá natar, tanba sira-nia moris depende ba halo natar.
“Agora kanu tuan sira barak ona mak sobu maibé bee la tama. Ne’e mak ami husu ba Governu atu buka dalan atu bee tama ba natar. Ami-nia moris depende ba natar ne’e”, nia hatete ba jornalista Tatoli, iha Maliana.
Natar-na’in seluk, Agostinho Gomes Pereira, rekomenda ba MAPPF atu koordena ho empreza internasionál PT. Minarta hodi buka meiu alternativu para fasilita agrikultór sira kontinua halo natar.
Nia subliña katak presiza halo intervensaun sedu tanba agrikultór sira besik ona tama faze preparasaun rai.
“Bee atu mai husi Intek labele tanba serbisu seidauk hotu. Di’ak liu buka mota besik rua ka tolu, foti bee mak uza makina boot atu ke’e dalan temporáriu para fahe ba kanu. Se la’e ami labele halo halo natar tanba bee lato’o”, nia hateten.
Diretór Servisu Munisipál Agrikultura husi Autoridade Munisípiu Bobonaru, Longuinhos João, konfirma katak nia parte hasoru ona responsavel PT. Minarta no empreza ne’e prontu atu buka solusaun.
“Ha’u hateten ba kompañia atu buka maneira detallu oinsá mak agrikultór sira fila-rai bee iha. Sira fó resposta imediata katak sei buka alternativa atu fornese bee ba natar ektare 150, para agrikultór sira bele kontinua kuda hare”, nia esplika.
Notisía relevante: Projetu reabilitasaun irrigasaun Maliana II atinji 13%
Projetu reabilitasaun irrigasaun Maliana II mak parte husi esforsu Governu garante seguransa ai-han no sustenta moris agrikultór sira iha área fronteira. To’os-na’in sira hein katak reabilitasaun sei remata tuir tempu no fó impaktu tanjivel ba ekonomia lokál.
Irrigasaun ne’e sei fornese bee ba natar iha área hamutuk ektare 1.401, inklui kuaze ektare 300 iha teritóriu Indonézia. Bainhira funsiona, irrigasaun ne’e sei bele fornese bee ba natar kuaze ektare 700 ne’ebé tinan barak ona abandona.
Esforsu ne’ebé Governu halo la’ós de’it ba hasa’e produsaun hare, maibé mós ba produtu seluk hanesan batar, modo, ikan no animál seluk.
Projetu reabilitasaun ne’e gasta orsamentu millaun $9-resin ho durasaun kontratu fulan 30 ka tinan rua-resin.
Notísia relevante: PM Xanana hatuur fatuk dahuluk ba projetu irrigasaun Maliana II
Jornalista: Sérgio da Cruz
Editora: Maria Auxiliadora
