OEKUSI, 08 Janeiru 2026 (TATOLI) – Diresaun Rejionál Infraestrutura (DRI) liuhusi Departamentu Eletrisidade Timor-Leste (EDTL) Rejiaun Administrativa Espesial Oekusi Ambeno (RAEOA), normaliza (hadi’a) ona ahi iluminasaun ne’ebé ema deskoñesidu estraga iha área ponte Noefefan suku Lifau sub-rejiaun Pante Makasar.
Notísia relevante:Ema deskoñesidu estraga fiu no tuda rahun ahi elétrika iha ponte Noefefan
Diretór Diresaun Rejionál Infraestrutura, Remígio Nuno Sila, konfirma, ahi iluminasaun ne’ebé aat iha área ponte Noefefan durante fulan neen mate, tanba ema deskoñesidu mak tesi-kotu fiu no no tuda rahun ampolas sira.
Tanba ne’e, Prezidente Autoridade RAEOA orienta kedas DRI presiza hadi’a, nune’e bele fasilita movimentu ema no transporte inklui vizitante sira iha tempu kalan, tanba fasilidade hirak-ne’e Estadu mak instala ba nesesidade públiku.
“Ita triste ho atitude ne’e, maibé depois ita hotu rona informasaun no parte EDTL verifika katak, loos duni ema deskuñesidu mak estraga, ne’ebé iha mumentu ne’e kedas Prezidente Autoridade orienta kedas diresaun hodi koordena ho departementu EDTL, atu tau matan, ne’ebé agora ita hadi’a ona, kalan naroman fali ona hanesan uluk,” nia hateten ba jornalista sira iha Oekusi, ohin.
Notísia relevante:Lixu namkari iha mota Ponte Noefefan, Abitante Lifau preokupa
Antes ne’e, Xefe Suku Lifau Delfino Sole, sente preokupa tanba ahi iluminasaun iha ponte Noefefan labele fó naroman iha tempu kalan.
Tanba ne’e, autoridade lokál ne’e, rekomenda ba Autoridade RAEOA atu monta seguransa ruma hodi hamutuk ho autoridade lokál sira tau atensaun liu-liu iha tempu kalan, tanba ponte Noefefan nu’udar fatin públiku ne’ebé atrai vizitante barak hodi hasai retratu no festeza seremónia família nian.
“Ha’u mós lahatene katak ema deskoñesidu estraga, maibé iha kalan kuandu ita liuhusi ponte ne’e, nakukun, maibé se EDTL hadi’a karik, presiza destaka seguransa ruma, nune’e ami bele hamutuk tau matan, liu-liu iha tempu kalan, ita haree fatin ne’e rame, entaun presiza tau matan,” nia propoin.
Notísia relevante:Autoridade RAEOA klarifika ema deskoñesidu mak sobu plaka iha ponte Noefefan
Rekorde fali katak, ema deskoñesidu ne’ebé tesi fiu ba ahi iluminasaun iha ponte Noefefan inklui tuda-rahun ahi eletrisidade sira, no mós sobu no estraga ponte ba iluminasaun ne’ebé afeta ahi mate totál durante fulan neen.
Maibé tuir observasaun Jornalista Ajénsia Tatoli,I.P, observa komesa tinan foun to’o agora daudaun ne’e lakan fali ona iha tempu kalan hanesan bai-bain.
Jornalista: Abílio Elo Nini
Editór: Rafael Ximenes de A. Belo
