OEKUSI, 13 Janeiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) aloka rihun $139,393.45 husi Orsamentu Jerál Estadu (OJE) 2025 hodi konstrui edifísiu iha Masakre Tumin suku Bobometo sub-rejiaun Oésilo.
Diretór Diresaun Rejionál Infraestrutura Oekusi, Remígio Nuno Sila, informa katak konstrusaun atu harii iha semitériu masakre Tumin, fazeadamente, tanba polítika husi Autoridade RAEOA hakarak moderniza sai fatin reflesaun.
“Projetu ne’e ita bolu dehan master-plant (planu-mestre). Nia dezeñu ita prepara ona, maibé ita harii ho fazeadamente, ezemplu tinan ida ita aloka osan harii kapela, morru no seluktan, ne’e mak agora ita hahú uluk nia edifísiu, tinan tuir ita sei haree fali nesesidade seluk, atu kompleta tiha dezeñu master-plant ne’ebé ita dezeñu ona,” nia hateten ba Ajénsia Tatoli,I.P liuhusi telefónika, tersa ne’e.
Notísia relevante:Autoridade sei moderniza Masakre Tumin nu’udar sentru reflesaun ba istória luta
Lembra katak, antes ne’e mós Prezidente Autoridade RAEOA, Régio da Cruz Salu, kompromete ona katak, sei halo modernizasaun atu sai sentru reflesaun no prezervasaun ba istória luta nian, tanba polítka atu hadi’a no moderniza masakre Tumin ne’e, hetan orientasaun direita hosi Primeiru-Ministru, Kay Rala Xanana Gusmão.
“Horsehik rezultadu tenderizasaun fó sai ona empreza manán na’in, ne’ebé sei fó tempu loron lima karik kompañia balun hato’o reklarasaun, hafoin ne’e mak ita selebra kontratu definitivu ho Prezidente Autoridade RAEOA, nune’e empreza bele hahú konstrusaun,” nia afirma.
Notísia relevante:Konkursu konstrusaun semitériu Masakre Tumin loke ona, Empeza sira bele konkorre
Konstrusaun atu konstrui edifisíu iha Masakre Tumin ne’e, sei ezekuta hosi empreza Kefi-Oél ho orsamentu rihun $139,393.45.
Notísia relevante:Ponte alternativa konstrui iha semitériu Masakre Tumin konkluídu
Jornalista: Abílio Elo Nini
Editór: Rafael Ximenes de A. Belo
