VIKEKE, 13 Janeiru 2026 (TATOLI)—Inan aman hamutuk ho veteranu sira no estudante Klase Paralela Sekundária Olokasa Uagia, Postu Administrativu Ossú, Munisípiu Vikeke, Tersa ne’e, organiza malu halo asaun pasífika iha edifísiu Ensinu Sekundáriu Olokasa hodi hato’o lametasaun kona-ba taka klase ne’e.
Responsavel Klase Sekundária Uagia, Eurósio Soares Ruas haktuir katak inan-aman no veteranu sira sente la satisfás ho desizaun taka klase ne’e tanba difikulta estudante sira-ne’ebé hela distánsia dook.
Notísia relevante:https://tatoli.tl/2025/12/23/autoridade-veteranu-no-komunidade-ossu-rejeita-desizaun-me-taka-sekundariu-filial-olokasa/
“Demonstrasaun ne’ebé sira halo ne’e laiha solusaun. Agora daudaun ne’e sira konsentra hamutuk fali iha klase paralela ne’e hodi fó-hanoin ba malu no prepara hanoin atu bá hasoru Prezidente Autoridade Munisípiu Vikeke,” Eurósio ba TATOLI liuhusi telemovel.
Nia hatutan, aban (14/01), parte relevante sira sei tun bá Vikeke hasoru PAM hodi hato’o sira-preokupasaun, maibé se ida-ne’e mak laiha desizaun, inan-aman no veteranu sira sei kontinua bá Ministériu Edukasaun hodi haree asuntu referidu.
Jornalista: Vitorino Lopes da Costa
Editór: Xisto Freitas da Piedade
