BOBONARU, 14 Janeiru 2026 (TATOLI) – Bee Timor-Leste (BTL) Munisípiu Bobonaru rekolla, husi Janeiru to’o Dezembru 2025, reseita hamutuk $47.177,35, kompara ho 2024 rihun $60.
Koordenadór BTL Bobonaru, Adriano da Cruz, hatete katak reseita iha tinan kotuk tun, tanba kliente balun la kumpre devér selu taxa ho razaun ladún hetan bee-moos ho sufisiente.
Notísia relevante: 2024, BTL, E.P Bobonaro rekolla reseita rihun $60,88 ba kofre Estadu
“Iha tinan 2025 ne’e, ita-nia reseita tun kuaze rihun $18 kompara ho tinan kotuk”, Adriano da Cruz hateten ohin.
Nia dehan reseita husi BTL Bobonaru la’ós de’it husi selu tarifária bee-moos husi kliente sira, maibé akumula mós husi parte administrasaun, hanesan taxa rejistu foun ne’ebé selu $55 ba kada metru kontadór.
Atualmente, iha área kapitál Maliana no postu administrativu Kailaku, BTL rejista totál metru kontadór 1.462. Husi númeru ne’e, 716 la funsiona no balun ne’ebé aat troka ona hamutuk 38. Enkuantu ida ne’ebé seidauk hadi’a hamutuk unidade 535.
BTL Bobonaru mós kontinua halo esforsu hodi espande sistema metru kontadór ba postu administrativu sira seluk. Iha Kailaku, BTL instala kontadór besik 200 no iha Lolotoe 178.
Iha Balibó, projetu instalasaun metru kontadór hamutuk 373 la’o hela no bainhira ramata BTL sei kontrata pesoál atu halo operasaun no manutensaun ba sistema.
Adriano da Cruz mós hateten katak BTL kontinua implementa sistema bee-moos iha Bobonaru Vila no Tapó, ne’ebé sei kobre besik suku 10 no aldeia 21. “Antes implementa, BTL sei halo sosializasaun ho komunidade iha suku Oe-Leu no Il-Sai hodi garante katak populasaun prontu koopera no integra ho servisu BTL”, konklui.
BTL Bobonaru espera katak ho hadi’a sistema no espansaun servisu bee-moos nian, reseita tarifária iha tinan sira tuirmai bele sa’e no serví komunidade ho di’ak liu.
Notísia relevante: Tinan 2022, BTL Bobonaro rekolla reseita rihun $35-resin
Jornalista: Sergio da Cruz
Editora: Maria Auxiliadora
