BOBONARU, 19 Janeiru 2026 (TATOLI) – Implementasaun Projetu Planu Dezenvolvimentu Integradu Munisipál (PDIM) tinan 2025 iha munisípiu Bobonaru hatudu ona progresu signifikativu. Maibé, ba implementasaun PDIM iha 2026 hasoru dezafiu tanba limitasaun orsamentu ne’ebé Komisaun Revizaun Orsamentu (KRO) aprova.
Diretór PDIM ba Autoridade munisípiu Bobonaru, Rui Bere Mau Barros, hateten katak husi totál projetu neen iha 2025, realizasaun atinje ona pursentu 90, ho pursentu 10 seluk nafatin hanesan fundu retensaun. Husi projetu sira ne’e, rua entrega ona mak konstrusaun Eskola Samuataben no Jardín Setembru Negro.
Nia mós destaka katak projetu sira seluk hanesan konstrusaun rezidénsia pesoál Saúde Postu Bobonaru, Eskola Bázika Filiál Beamuas Kolimau no sala maternidade Ritabou, la’o tuir planu, no empreza konstrutora sira sei entrega projetu sira ne’e iha semana ida-ne’e nia laran.
Entretantu, projetu irigasaun Genumatan nafatin la’o tuir planu, ho pagamentu atinji pursentu 80, no pursentu 20 seluk sei remata antes fulan-Maiu 2025.
Notísia relevante: Konkursu públiku ba projetu PDIM 2026 iha Bobonaru tenke imparsiál
“Ita-nia projetu 2025 nia kuaze atu hotu ona, hela de’it irrigasaun Genumatan. Agora ita hasoru problema mak projetu 2026 nia ne’e”, Rui Barros hateten ba Tatoli, ohin.
Kona-ba PDIM 2026, Rui Barros esplika katak Autoridade Munisipál Bobonaru iha projetu 22 ne’ebé kompleta ona etapa pré-kualifikasaun iha nivel munisípiu. Dokumentu hotu-hotu hatama ona ba nivel nasionál no agora hein hela rezultadu verifikasaun molok kontinua ba prosesu aprovizionamentu.
Maibé, nia afirma katak limitasaun orsamentál ne’ebé KRO aprova sai dezafiu. Tuir nia, alokasaun verba ne’ebé iha la aliña ho proposta orsamentu inisiál ne’ebé ekipa téknika PDIM Bobonaru prepara, no valór signifikativu ki’ik liu.
“Ita-nia proposta inisiál ne’e tau millaun $4-resin, maibé aprova de’it milaun $2-resin ho projetu 22. Ne’e mak ami hakerek ona karta ba Diretór Planeamentu Orsamentál iha Ministériu Finansa, maibé seidauk hetan resposta. Segunda liubá, ami haruka tan karta ida ba Ministériu Administrasaun Estatál atu halo konfirmasaun”, nia dehan.
Hodi subliña katak bainhira laiha ajustamentu ba orsamentu, posibilidade PDIM 2026 labele implementa.
Rui Barros husu ba Governu sentrál atu fó kedas serteza kona-ba orsamentu, nune’e prosesu aprovizionamentu projetu PDIM 2026 bele remata antes fulan-Marsu ka Abríl, no dezenvolvimentu iha Rejénsia Bobonaru bele la’o tuir planu.
Iha tinan 2026, Autoridade Munisípiu Bobonaru simu projetu PDIM hamutuk 22, ho totál orsamentu millaun $2.750.460. Projetu hirak ne’e mak konstrusaun no reabilitasaun sistema bee-moos, irrigasaun, postu saúde, eskola, merkadu, kampu multifunsaun, no infraestrutura seluk iha postu administrativu sira hanesan Atabae, Balibó, Maliana, Lolotoe, Kailaku, no Bobonaru.
Notísia relevante: Bobonaru prevee millaun $2,7 iha PDIM hodi implementa projetu 22 iha tinan oin
Jornalista: Sergio da Cruz
Editora: Maria Auxiliadora
