BOBONARU, 19 Janeiru 2026 (TATOLI)-Líder komunitáriu no populasaun sira husu ba Governu atu harii foun fali ponte Miguir, iha suku Aidabalaten, postu administrativu Atabae, munisípiu Bobonaru, tanba ponte ne’ebé daudaun iha, bainhira tempu udan sempre provaka inundasaun hodi danifika uma no plantasaun.
Xefe aldeia Miguir, José Angelino, aprezenta asuntu ne’e tanba intervensaun ne’ebé Governu halo, liuhusi Istitutu Jestaun Ekipamentu no Apoiu Dezenvolvimentu Infraestrutura (IGEADI) halo iha terrenu labele rezolve problema no posiblidade udan ho volume aas bele provoka nafatin inundasaun.
Nia observa katak ponte ne’e ho modelu Box Four Cells ho nia espasu kloot, nune’e sadimentasaun ne’ebé mota lori bá belit hotu iha ponte riin hodi rezulta bee-mota tama fali ba komunidade sira-nia hela-fatin.
Notísia relevante: IGEADI hasai ona sedimentasaun iha ponte Miguir
“Mota Miguir ne’e nia distásia dook, depois mota mós luan, nia volume bee mós boot. Ponte ne’ebá ami haree la’ós hanesan ponte, ne’e halo hanesan kuartu ba ita toba fatin ne’e. Tuir ha’u nia hanoin, ponte ne’e tenke sobu halo fali ku’ak ida de’it para bee lori ai sira mai mós bá liu. Se ku’ak barak nia luan metru rua ho balun de’it ne’e ai sira mota lori mai ne’e mesak naruk-naruk de’it, entaun nia labele liu”, nia dehan ba Tatoli, ohin.
Atu prevene inundasaun, nia mós fó hatene ona ba komunidade sira atu labele tesi ai arbiru iha foho-lolon no mota-ninin.
Komunidade Adelinda de Jesus observa katak ba futuru inundasaun sei akontese iha Miguir, ne’ebé bele afeta ba ema nia vida. “Udan tan, sira hela besik ne’e balun susar bele kona. Ami sira viajen husi Maliana atu bá Dili ne’e mós kuandu udan liu iha ne’e ta’uk la halimar. Tanba ne’e mak ami husu ba Governu atu buka meiu oinsá para rezolve problema ne’e”, nia sujere.
Daudaun ne’e, ekipamentu pezadu husi IGEADI prontu iha terrenu hodi halo normalizasaun ba mota no hasai sedimentasaun bainhira akontese tan inundasaun.
Notísia relevante: IGEADI hasai ona sedimentasaun iha ponte Miguir
Jornalista: Sergio da Cruz
Editora: Maria Auxiliadora
