DILI, 15 Maiu 2026 (TATOLI)–Ofisiál Justisa akompaña husi Autoridade Seguransa, Autoridade lokál no entidade relevante seluk, Sesta ne’e, ezekuta desizaun Tribunál hodi halo eviksaun ba fatin ne’ebé ekupadu husi família Lurdes Menezes, iha Aldeia Metin III, Suku Bebonuk, Postu Administrativu Dom Aleixo, Munisípiu Dili, tanba rai ne’e afavór ba Mari Alkatiri.
Durante ezekuta mandadu ne’e, akompaña mós hosi Mari Alkatiri inklui família Lurdes Menezes.
Bazeia ba akordaun, disputa rai ho medida 16.155 m² afavór ba Autór Mari Alkatiri iha loron 09 Janeiru 2026 no esepsaun parsela (la sobu) medida 1.560 m2².
Ofisiál Justisa (la temi naran) hateten, sira-nia prezensa iha terrenu atu halo serbisu tuir despaisu ne’ebé iha.
“Entaun parte mandatáriu (reu) iha hotu koñesimentu ona, nune’e ami mai la’ós atu konfirma ka halo negosiasaun fali, maibé atu halo ezekusaun ka entrega,” Ofisiál Justisa hato’o ba Jornalista sira iha Aldeia Metin III.
Notísia relevante : Lurdes Menezes lamenta ho Tribunál nia desizaun ne’ebé afavór ba Mari Alkatiri
Nia dehan, iha desizaun ne’e sei entrega de’it rai ne’ebé refleta ba autór nian no dalan atu asesu bá laran liuhusi portaun, maibé sira lakohi koopera, tanba ne’e ekipa hein hela atu uza forsa mákina pezadu sobu husi parte leten.
“Atu nune’e ita tama bá hodi haree rai ida-ne’ebé mak Tribunál deside ona atu hamamuk, notifikasaun ne’e dezde kedas promulga desizaun no ita hatene katak la manán ona iha kazu ne’e, ohin ami mós partilla ona informasaun ba reu (Lurdes) maibé nia mak lakohi mai atu koopera,” Ofisiál Justisa, informa.
Nia hatutan, bainhira reu lakohi koopera maka automátikamente Tribunál sei uza forsa mákina pezadu tamba iha despaiu define ona atu halo arombamentu ba portaun.
Advogadu laiha koñesimentu
Iha sorin seluk, Advogadu husi Lurdes Menezes, Octávio Cardoso, hateten, nia parte seidauk simu notifikasaun husi parte Tribunál atu halo eviksaun ba rai ne’e.
“Ha’u ohin liu husi ne’e, ha’u haree ema barak entaun ha’u para, maibé ha’u la simu notifiksasaun husi Tribunál ka laiha koñesimentu direta,” Advogadu konta tuir.
Nia dehan, tamba hafoin revogasaun ba akordaun Tribunal Rekursu, prosesu ne’e liuhusi reklamasaun husi juíze sira ne’ebé halo revogasaun ba sira-nia desizaun rasik, ne’ebé deside atu absolve Lurdes Menezes husi prosesu, maibé iha revogasaun deside halo parsiál.
Advogadu mós la konkorda ho medida rai ne’ebé iha ka la tuir supervizaun ne’ebé antes ne’e parte relevante sira sukat, tamba ne’e nia husu ba Ofisiál Justisa sira atu halo loloos supervizaun ba rai molok halo eviksaun.
“Tamba ne’e, ha’u-nia dúvidas mak ne’e, se sira mai ho mapamentu anteriór ne’ebé akordaun dahuluk husi Tribunál Rekursu kona-ba supervizaum rai, maibé se ita mai mak hanesan la tuir supervizaun ne’e laloos ka difisíl atu define ninia supervizaun, entaun dalan maka ita tenke halo rekursu estraordináriu,” nia lamenta.
Advogadu konsidera, ko’alia kona-ba justisa, karik buat ne’ebé la’ós pertensa ba ita-nia tenke brani hateten dehan la’ós ita-nia, maibé bainhira iha prova sufisiente bele deklara katak ita mak manán tamba ema hotu hanesan iha lei nia oin.
“Signifika, ha’u la ko’alia dehan sé sé maka ko’alia, maibé ha’u asegura nia prosesu husi inísiu ho prinsípiu ida katak ema hotu presiza asisténsia legál, maski nia maubere ain tanán ka ema riku, ha’u asegura nia direitu, maibé ko’alia kona-ba desizaun tenke justu,” nia argumenta.
Nune’e, durante eviksaun ne’e mosu dezentendimentu entre parte rua Mari Alkatiri ho nia família lamenta ho intervensaun husi Advogadu nian, ne’ebé impede Autoridade Judisiál nia serbisu iha terrenu.
Iha intervensaun, Mari Alkatiri, husu atu membru Polísia nasionál Timor-Leste (PNTL) ne’ebé iha terrenu atu asegura Advogadu referidu atu labele impede prosesu.
“Se ita-boot hakarak ko’alia ho mídia bele muda bá sorin tamba mákina atu halo nia serbisu, ita-boot la respeita desizaun tribunál,” Mari Alkatiri, katak.
Maski konsege mosu dezentendimentu maibé ikus mai Advogadu no Ofisiál Justisa konkorda halo eviksaun bazeia ba medida ne’ebé iha.
Tuir observasaun Jornalista Ajénsia TATOLI iha terrenu, nota katak mákina pezadu kontinua halo eviksaun ba materiál sira iha rai ne’ebé indika ba autór no prosesu sira ne’e hotu akompaña direta husi autór ba rai, advogadu, parte PNTL, autoridade lokál inklui komunidade lokál.
Jornalista : Alexandra da Costa
Editora : Julia Chatarina
