DILI, 13 Maiu 2026 (TATOLI)-Prezidente Komisaun Funsaun Públika (KFP), Agostinho Letêncio de Deus, koordena ho Ministériu Justisa (MJ) atu realiza promosaun grau ba funsionáriu sira iha guarda prizionál ne’ebé durante ne’e hala’o ona serbisu tinan 20-resin.
“Ami foti inisiativa ne’e, serbisu hamutuk ho Ministériu Justisa no iha ona koordenasaun atu iha tinan ida-ne’e ita halo duni promosaun antiguidade ba sira”, nia adianta.
Tuir nia, guarda prizionál sira ne’e hahú serbisu nu’udar funsionáriu dezde 2000. Husi tinan sira ne’e mai, sira-nia grau barak liu mak E, G no F, tanba uza rejime espesiál ne’ebé durante ne’e laiha ligasaun ho KFP.
Prezidente KFP esplika katak promosaun ba rejime jerál ne’e Komisaun mak jere, maibé rejime espesiál fó ba ministériu idaidak mak jere no organiza. “Maibé, agora iha dekretu-lei rua ba promosaun jerál. Tuir teste eletróniku iha Funsaun Públika no ida seluk mak promosaun pur antiguidade ne’ebé bazeia de’it ba kritéria sira”, dehan.
Tanba ne’e, ho polítika iha mandatu dahaat KF nian hahú define promosaun pur antiguidade no foin hala’o iha tinan 2025. “Katak sira ne’ebé serbisu ona liu tinan ualu, rekolla sira-nia dadus no bainhira prienxe hotu bele pasa de’it sein teste eletróniku”, nia afirma.
Jornalista: Nelson de Sousa
Editora: Maria Auxiliadora
