OEKUSI, 20 Janeiru 2026 (TATOLI) – Primeiru-Ministru (PM), Kay Rala Xanana Gusmão, tersa ne’e, hala’o vizita traballu ba sarani sira iha suku Bobokase sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Iha sorumutu ofisiál ne’e, Xefe Governu haree direta progresu konstrusaun Kapela São Carlos Boromeu, iha aldeia Bimelo, suku Bobokase no promete apoia finanseiru sufisiente atu finaliza konstrusaun referida, tanba kapela ne’e rasik kontribui rasik husi komunidade sira.
Tuir observasaun Jornalista Ajénsia Tatoli,I.P, bainhira Xefe Governu to’o iha Kapela São Carlos Boromeu sarani sira simu Primeiru-Ministru ho antusiazmu, hafoin ne’e sarani sira konvida kedas Primeiru-Ministru ba haree progresu konstrusaun Kapela nian ne’ebé seidauk konkluídu.
Nune’e, hafoin observa tiha konstrusaun, sarani sira entrega proposta ida bá Primeiru-Ministru, reprezenta husi katekista, Sixto Tafin, ho intensaun husu apoia orsamentu hodi bele finaliza.
Bainhira simu tiha proposta ne’e, Primeiru-Ministru promete katak fila tiha ba Dili maka haruka ekipa ida lori hela apoia mai hodi bele finaliza tiha konstrusaun tanba finansiamentu kapela ne’e mai husi kontribuisaun sarani sira nian.
“Imi-nia surat ne’e ha’u simu ona, ne’ebé ha’u fila-fali ba Dili mak ha’u haruka sira balun lori mai hodi imi finaliza tiha imi-nia kapela ne’e,” Primeiru-Ministru promete, molok kontinua vizita traballu ba komunidade sira iha Kutete, ohin.
Notísia relevante: https://tatoli.tl/2026/01/19/primeiru-ministru-oferese-krus-ba-kapela-sao-alfonso-manunesi-iha-pante-makasar
Iha biban ne’e, Katekista Kapela São Carlos Boromeu, Sixto Tafin, orgullu tanba ho prezensa Primeiru-Ministru bele tau matan ba inisiátiva ne’ebé komunidade kontribui rasik hodi kontrui kapela ne’e.
“Ami kontente, tanba maske udan boot maibé Avo Nana bele mai to’o ami-nia fatin, atu haree direita ami-nia kapela ne’e, tan ne’e husu apoia netik ba Avo, tanba ami-nia kbi’it la to’o ona atu finaliza ami-nia kapela ne’e,” nia hato’o.
Notísia relevante: https://tatoli.tl/2024/10/14/pm-xanana-husu-timoroan-sira-iha-portugal-kontribui-ba-prosesu-dezenvolvimentu-nasaun
Entretantu, iha vizita traballu ne’e, akompaña hosi Ministru Planeiamentu Investimentu no Estratéjiku (MPIE), Gastão Sousa, Prezidente Autoridade RAEOA, Régio da Cruz Salu inklui kargu xefia sira seluk.
Jornalista: Abílio Elo Nini
Editór: Rafael Ximenes de A. Belo
