LISBOA, 13 outubru 2024 (TATOLI) – Primeiru Ministru, Kay Rala Xanana Gusmão, husu sidadaun timoroan iha Lisboa, Portugál atu kontribui ba prosesu konstrusaun estadu no dezenvolvimentu nasionál.
Xefi Governu, Xanana Gusmão, esplika, prezensa iha Portugál nu’udar vizita ofisiál ne’ebé sei hasoru líder órgaun soberanu sira inklui Prezidente Repúblika Portugál hanesan parte hato’o sentidu soliedariedade ba Komunidade Lian Portugés (CPLP, sigla portugés) .
“Timoroan hotu ne’ebé iha rai-li’ur tenke aprende barak para serbí ba nasaun no povu, povu tenke sente dezenvolvimentu,” Primeiru Ministru Xanana Gusmão hateten iha Lisboa, domingu ne’e.
Prosesu konstrusaun estadu presiza kontribusaun hosi entidade no setór hotu hanesan prátika matenek ne’ebé iha hodi kontribui ba dezenvolvimentu no setór privadu mós presiza investe hodi hasa’e ekonomia nasaun inklui sosiedade sivíl tenke ativa hodi fó solusaun ba problema sosiál.
Líder nasionál ne’e husu atu sidadaun timoroan iha Portugál, bainhira fila tenke kontribui totalmente no hasees tiha ego pesóal no dedika aan tomak ba interese nasionál.
Prosesu dezenvolvimentu no konstrusaun estadu la halo iha loron-ida de’it, maibé liuhusi fazeadamente, maske neineik maibé tenke hasoru, inportante kontribusaun husi sidadaun tomak nune’e Timor-Leste bele sai husi situasaun krítiku sira.
Xanana Gusmão, informa ba timoroan sira iha Portugál relaisiona ho prosesu konstrusaun Estadu ne’ebé hasoru situasaun oinoin hanesan instituisaun estadu sira seidauk hala’o funsaun loloos inklui konsiénsia sosiedade ba kontribusaun dezenvolvimentu nasaun.
Xanana Gusmão, akresenta, bainhira instituisaun estadu hanesan órgaun soberania hanesan Prezidente Repúblika, Parlamentu Nasionál, Governu no Justisa la funsiona ho loloos bele konsidera hanesan frajil.
Nune’e, iha tinan-2010 Timor-Leste inisia hodi estabelese organizasaun G7+ hamutuk ho nasaun membru sira seluk ne’ebé konsideradu estadu frajil hanesan hakat liuhusi faze konflitu no post konflitu.
“Kuandu instituisaun estadu sira la funsiona, fó impaktu ba prosesu dezenvolvimentu,” Xanana Gusmão akresenta
Alende hasoru timoroan, Primeiru Ministru mos hasoru malu ho Sekretáriu Jerál Uniaun Sidadaun Kapitál Lian Portugés (UCCLP, sigla portugés) Vitor Ramalho hodi ko’alia kona-ba dezenvolvimentu iha setór sidade saudável no kulturál.
Partisipa iha sorumutu referida sidadaun timoroan sira iha Portugál kompostu padre no madre, estudante no komunidade sira.
Notísia relevante: Xanana Gusmão simu prémiu Luzofonia iha Lisboa
Jornalista : Natalino Belo
Editór : Evaristo Soares Martins
