OEKUSI, 20 Janeiru 2026 (TATOLI) – Primeiru-Ministru (PM), Kay Rala Xanana Gusmão, apresia Autoridade Nasionál Minerál (ANM), tanba atividade prospesaun no peskiza ba rekursu minerál metaliku iha Rejiaun Administrativa Espesiál Oekusi Ambeno (RAEOA) hatudu ona progresu.
Xefe Governu hato’o nia apresiasaun ne’e, bainhira partisipa iha aprezentasaun progresu atividade minerál no potensialidade rekursu mineraís, ne’ebé aprezenta husi Autoridade Nasionál Minerál (ANM) iha Oekusi, tersa ne’e.
“Ha’u senti di’ak tebes, bainhira Oekusi-oan sira, bele hatene dehan ita iha potensiál bo’ot iha mineraís, ohin ha’u rona iha ona progresu, di’ak teb-tebes, parabéns,” dehan Primeiru-Ministru iha salaun alfandega Oekusi, ohin.
Notísia relevante:Governu atribui lisensa ba empreza Iron Fortune halo peskiza ba minerál metáliku iha Oé-Cusse
Iha biban ne’e mós PM enkoraja komunidade atu koopera no husu mós ekipa ANM atu kria planu ordenamentu do territóriu atu define fatin sira-ne’ebé bandu atu halo prospresaun rekursu minerál
“Ha’u husu komunidade sira koopera ho ANM, liu-liu fatin sira-ne’ebé bandu tanba halo natar ka to’os, ita-boot sira tenke iha planu ordenamentu territóriu, atu hatene fatin ne’ebé mak labele tama, hanesan ba turizmu karik kapa’as ou ai-kameli barak, labele book, tanba ne’e la’ós ba ema ida nian, maibé ba povu no rai ne’e rasik, hodi hatudu ba mundu nia beleza (furak),” nia apela.
Notísia relevante:Xanana lansa atribuisaun lisensa prospesaun no peskiza ba mineiru metáliku iha Lautem
Prezidente Autoridade Nasionál Minerál, Rafael de Araújo, esplika, aprezentasaun ne’e importante, partikularmente setór mineiru ne’ebé la’o hela iha Oekusi, tanba iha Oekusi, empreza rua, ida husi Austrália no ida husi Indonézia mak halo hela prospesaun no peskiza,
“Tinan kotuk ita emite ona lisensa ba empreza Iron Fortune, konforme relatóriu ne’ebé empreza submete ona, hatudu katak iha potensialidade di’ak ba rekursu sira hanesan manganes, tan ne’e ita suporta hela sira, atu kontinua buka hatene rekursu saida de’it mak ita iha, liu-liu ba prosesu prospesaun, ne’ebé Governu atribui lisensa ba empreza sira, atu kobre osan mean, manganes, minerál kronitu, ne’e ita klasifika ba mineraís tipu metaliku sira, empreza rekolla ona amostra balun no lori ona ba rai-li’ur hodi teste ba laboratóriu maibé atu rekolla ba prosaun seidauk,” nia hateten.
Nia informa, progresu ne’e hanesan mós iha sub-rejiaun Oésilo no Pássabe, empreza Indonézia, ne’ebé emite ona lisensa, semana kotuk foin mak halo serimónia rituál iha suku Naimeko sub-rejiaun Pante Makasar, hafoin ne’e mak empreza sei dezloka tékniku geolojia sira tuun ona ba terrenu.
Notísia relevante:https://tatoli.tl/2024/04/19/autoridade-raeoa-rekomenda-halo-tuir-kultura-molok-halo-peskiza-ba-rekursu-mineral/
Bazea dadus Agência Tatoli,I.P asesu iha Autoridade Nasionál Mineiru (ANP), katak área ba atividade prospesaun no peskiza ba minerál metáliku iha Oekusi hamutuk fatin rua, alvu (target) sei kobre ouru ka osan mean, manganese no osan mutin.
Fatin dahuluk lokaliza iha sub-rejiaun Pante Makasar iha suku Taiboko aldeia Maquelab, Ulas, Nemun no aldeia Hauboni, envolve mós sub-rejiaun Nítibe husi Suni-Ufe aldeia Cabana, Fuabano no aldeia Oélcaem, suku Usitaku iha aldeia Nítibe no Kuantua, suku Lela-Ufe iha aldeia Hau-Ufe ho área konsesaun MEL2023-CA-ZG004.
Fatin daruak, iha sub-rejiaun Nítibe iha suku Ban-Afi aldeia Kuanobe no Hau-Tefo, envolve mós sub-rejiaun Pássabe iha suku Abani aldeia Haemnanu, Pássabe no aldeia Naetuna, inklui sub-rejiaun Oésilo iha suku Bobometo aldeia Quibiselo no Tumin, suku Usitaqueno iha aldeia Nibin ho área konsesaun MEL-CA-ZG007.
Jornalista: Abílio Elo Nini
Editór: Rafael Ximenes de A. Belo
