OEKUSI, 21 Janeiru 2026 (TATOLI) – Primeiru-Ministru (PM), Kay Rala Xanana Gusmão kuarta ne’e, hala’o vizita traballu bá Asosiasaun Easy Learning English (ELE), hanesan sentru kapasitasaun dalen inglés iha Postusika, suku Lifau, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
“Orgullu ho imi-nia prezensa, iha vila laran ne’ebá SOLS, maibé imi harii inisiativa ne’e kapaas, ne’e hanesan investimentu ida ba joven sira, oferese kapasitasaun bá foin-sa’e sira ba lian Inglés hanesan lian ba mundu tomak, ida-ne’e atu halo saida? Prepara joven sira ba futuru, liu-liu imi Oekusi-oan nia futuru,” PM Xanana, ko’alia hafoin vizita asosiasaun ELE iha Postusika, ohin.
Iha biban ne’e, Xefe Governu enkoraja foin-sa’e sira ne’e atu kontinua aprende hodi bele sai nu’udar bukae ida ba futuru, tanba atu dezenvolve nasaun presiza rekursu sira-ne’ebé kualidade.
“Aban bairua, investimentu barak sei mai, ita ba rai-li’ur, la’ós ita ko’alia fali Baikeno, Inglés mak kritéria primeiru, iha oportunidade barak, bele ba serbisu iha rai-li’ur, buat barak; importante hatene ko’alia ho lingua oi-oin, inglés ne’e mak lian ba nasaun hotu, ne’ebé tuir ba, aprenda ba, tempu sei to’o ba imi, labele baruk, aprende nafatin!” Xefe Governu fó hanoin.
Iha oportunidade ne’e, Prezidente Asosiasaun ELE, Salamão Mesak, relata, sentru formasaun ne’e ejiste iha 2024 kapasita ona joven sira, barak mak gradua ona, no daudaun ne’e hela na’in-25 mak ativu, komposta husi tempu inteiru (full-time) 14 no parsiál (partime) 11.
Iha biban ne’e, estrutura Asosiasaun ELE, entrega proposta ofisiál ida Primeiru-Ministru, hodi husu apoia kona-ba konstrusaun hanesan fatin ba kursu nian inklui mobiliáriu. No, Primeiru-Ministru responde kedas, la promete apoia kedas maibé sei konsidera, iha tempu ruma sei tau matan, tanba iha suku balun mós submete ona proposta hodi husu apoia kona-ba konstrusaun Kapela.
Notísia relevante:PM Xanana sei apoia sarani Bobokase finaliza Kapela São Carlos Boromeu Bimelo
Observasaun Jornalista Ajénsia Tatoli,I.P, iha vizita ne’e PM Xanana fahe mós kamizola ho marka, ‘Ha’u-nia tasi, ha’u-nia Timor’ bá foin-sa’e sira-ne’ebé daudaun aprende lian Inglés iha asosiasaun ne’e.
Entretantu, akompaña vizita ne’e, Ministru Planeamentu no Investimentu Estratéjiku (MPIE), Gastão Sousa, Ministru Administrasaun Estatál (MAE), Tomás do Rosário Cabral no Prezidente Autoridade RAEOA, Régio da Crúz Salu.
Jornalista: Abílio Elo Nini
Editór: Rafael Ximenes de A. Belo
