DILI, 23 Janeiru 2026 (TATOLI)—Embaixadór Timor-Leste ba Laos, João Câmara, konsidera desizaun Timor-Leste ho Laos aplika livre vistu ne’e sei hametin liután kooperasaun bilaterál no bele fasilita movimentu ho pasaporte diplomátiku, servisu no komun.
Notisia Relevante: Timor-Leste ho Laos aplika ona livre vistu
“Kona-ba movimentu ema-nian ne’e ita asina tiha hotu ona ho nasaun membru ASEAN nian molok Timor-Leste sai membru ASEAN,” Embaixadór Timor-Leste ba Laos, João Câmara, informa ba jornalista sira hafoin ahsoru malu ho Primeiru-Ministru, Kay Rala Xanana Gusmão, iha Palásiu Governu, ohin.
Nia dehan, normalmente la’ós de’it uza pasaporte diplomátiku no pasaporte servisu mak bele halo movimentu, maibé pasaporte komun mós bele halo movimentu tama no sai tanba Timor-Leste hanesan ona membru ka família ona.
“Maibé tenke iha kontrolasaun tanba imigrasaun ne’e kontinua la’o tanba uluk pasaporte komun susar atu halo viajen maibé agora ita bele livre halo movimentu ba-mai laiha problema ida,” nia hateten.
Antes ne’e, iha 20 Janeiru 2026, Vise- Ministra Asuntu ASEAN, Milena Rangel, hateten Timor-Leste ho Laos daudaun ne’e livre ona vistu tanba Governu nasaun rua asina ona akordu iha tinan 2024.
“Iha tinan rua (2) liuba kuandu Laos mak prezide hela ASEAN nu’udar uma-na’in iha altura ne’ebá, iha simeira, ita mós asina ona akordu ida-ne’ebé kona-ba livre vistu. Agora ba nasaun rua (2) ne’e livre vistu viajen ba Pasaporte tipu tolu ne’e hotu mak diplomata, serbisu no komun,” Milena hateten.
Tanba ne’e, nia hateten, povu husi nasaun rua halo viajen ba mai livre no la selu tan vistu hanesan tinan sira ba kotuk.
Notisia Relevante: Governu entrega rai no edifisiu ba Governu Laos hodi estabelese Embaixada
Jornalista : Alexandra da Costa
Editór : Cancio Ximenes
